ملتان ۔ 21 جولائی (اے پی پی) ایڈیشنل چیف سیکرٹری جنوبی پنجاب فواد ہاشم ربانی آکھیے ملتان سودھے جنوبی پنجاب اچ ارباں روپے دے ترقیاتی کم جاری ہن،جنھاں کوں وختی پورا کرݨ سانڳے کوشاں ہیسے۔ اے ڳالھیں انہاں سابق ڈائریکٹر ہیلتھ سروسز ملتان ڈویژن ڈاکٹر سیدین نقوی نال ملاقات اچ آکھئن ۔ انہاں آکھیے جو صحت تے تعلیم دے منصوبیں کوں مقررہ ٹائم لائن اچ مکمل کرݨ انہاں دی اولین ترجیح اے۔ جنوبی پنجاب سیکرٹریٹ چھیکڑی مرحلے وچ اے جیں دا فیدہ عوام بندے کوں تھیسی انہاں آکھیے جنوبی پنجاب سیکرٹریٹ تے سارے افسر خطے رے لوکاں دے مسئلے مکاوݨ سانڳے تے اتھاں ترقیاتی کماں دا ڄال وچھاوݨ سانڳے ݙینھ رات محنت کریندے پئن ۔ سابق ڈائریکٹر ہیلتھ سروسز ملتان ڈویژن ڈاکٹر سیدین نقوی انہاں کوں شہر دے وکھو وکھ مسئلیں دا ݙسایا تے انہاں کوں مکاوݨ سانڳے تجویزاں ݙتن جیں دی ایڈیشنل چیف سیکرٹری جنوبی پنجاب فواد ہاشم ربانی تعریف کیتی تے سارے مسئلے مکاوݨ دا یقین ݙیوائے
