اسلام آباد۔ 24 جولائی (اے پی پی) سرائیکی زبان دے عظیم صوفی شاعر حضرت خواجہ غلام فریدؒ دا 123 یوم وصال منایا ڳئے۔ ایں موقع تے سرائیکی نیوز سروس نال گالھ مہاڑ کریندے سرائیکی عوامی تریمت تحریک دی نائب صدر ادی نیناں آکھيا جو سرائیکی زبان دے عظیم صوفی شاعر حضرت خواجہ غلام فریدؒ ( خورشید عالم سئیں) دا وصال 24 جولائی 1901ء بمطابق 6 ربیع الثانی 1319 ھ کوں تھیا ہا، عیسوی کلینڈر دے مطابق آپ دے وصال کوں 123سال تھی ڳئین، اونویں تاں آپ دا عرس مبارک قمری کلینڈر دے مطابق منایا ویندے۔ خواجہ سئیں آپݨیں مادری زبان سرائیکی دے نال نال عربی، فارسی، اردو، ہندی، سندھی تے پوربی ءچ وی علم حاصل کیتا، کجھ انگریزی وی سِکھی، ایں واسطے خواجہ سئیں کوں ہفت زبان آکھیا ویندے. اڄ عیسوی کلینڈر موجب خواجہ سئیں دے وصال دے ݙینہہ روہی تھل دمان دے وارث قلم قبیلے دے اڳواݨیں، مُہاندریں، نمائندیں تے سمورے بھیݨیں، بھرانویں کنوں ارداس اے جو خواجہ فرید دی شاعری کوں نینگراں تئیں پچائوں آپݨی شناخت تے حق سانگے ہِک مٹھ تھی ٻاݨ ماروں، آپݨیں نسلاں کوں ہک سوہݨا تے سَوکھا مستقبل دان کروں انھاں داآکھنڑ ہا اساں ݙینہہ رات خواجہ فرید دیاں کافیاں سنڑدے ہاں تے اساکوں نینگراں کیتے سرائیکی تحریک خواجہ فرید دی شاعری ذریعے نینگراں سانگے سوشل میڈیا تے تکھے چلاونڑی چاہیدی اے ، ونکو ونک دے لیڈر جھمراں دی وڈیو سوشل میڈیا اُتے چلا تے سمجھدن اساں ماء دھرتی دا حق ادا کرݙتے، انھاں سبھے کوں چاہیدا اے تے نال ای سارے اڳواݨ وی کوشش کرن جو خواجہ فرید دی شاعری ذریعے لوکیں تئیں سنیہے پچاون۔۔
سوہݨاں یار فرید ݙوں آوے
ڳل لاوے سیج سُہاوے
آ اُڄڑی جھوک وَساوے
ہے ٹھݙڑی آہ اثر کر
