بہاولپور 31 جولائی(اے پی پی) محکمہ ٹورازم آرکیالوجی اینڈ میوزیم ڈیپارٹمنٹ حکومت پنجاب صادق ڳڑھ پیلس کوں محفوظ قومی ورثہ قرارݙتے ، نوٹیفیکیشن موجب اے فیصلہ کابینہ دے فیصلے موجب کیتا ڳئے ۔ بہاولپور دی شاندار نشانی اتے عظیم محل صادق ڳڑھ پیلس جیڑھا تحصیل احمدپورشرقیہ دے علاقے ڈیرہ نواب اچ اے۔نواب محمد خان عباسی پنجم 1882 اچ اے محل بݨوایا ہئی جیں کوں بݨاوݨ سانڳے 15 ہزار مستری مزدور تے کاریگر انجینئرز کم کیتا ہئی تے اے عظیم محل جیں کوں وائٹ پیلس وی آکھیا ویندے جیڑھا چٹے ماربل نال بݨایا ڳیا ہئی اینکوں بݨݨ اچ ݙاہ سال لڳیے ہن جݙاں جو ایں تے 15 ملین دی لاڳت آئی ہئی۔ اے وی ݙسایا ڳئے لارڈ ماؤنٹ بیٹن، شاہ ایران اتے قائداعظم جیہی وݙی شخصیات بطور مہمان ایں محل اچ قیام کیتا ہئی ۔صادق گڑھ پیلس کوں نوادرات ایکٹ 1968 دے تحت 1975 اچ پراݨے قومی ورثہ حکومت دی طرفوں قرار ݙتا ڳیا ہئی تاں جو اے موجودہ نواب آف بہاولپور صلاح الدین عباسی دی ملکیت اچ ہئی تے نواب صلاح الدین عباسی ایں محل دے نال رہائش گاہ اچ رہندے ہن ۔ٹورازم ڈیپارٹمنٹ بہاولپور دے افسر سید حیدر رضا ݙسائے محفوظ قومی ورثہ قرار ݙتے ونڄݨ دے بعد اے ایجھے ورثہ کوں آثار قدیمہ اپݨی تحویل اچ گھن گھندے تے ایں قومی ورثہ دے حوالے نال سارے معاملات دی ذمہ واری آثار قدیمہ دی ہوندی اے ۔ایں حوالے نال جݙاں نواب صلاح الدین عباسی دے صاحبزادے شہزادہ بہاول خان عباسی نال رابطہ کیتا ڳیا تاں انہاں انکشاف کیتے کہ محکمہ ٹورازم انہاں دی اجازت اتے این او سی دے بغیر اے نوٹیفیکیشن جاری کیتے اساں ایں فیصلے تے راضی کائنی ۔ انہاں آکھیے او وختی حکومت پنجاب اتے محکمہ ٹورازم نال رابطہ کریسن تے جیڑھے قانونی رستے ہن انہاں کوں استعمال کیتا ویسی۔18:48
