اسلام آباد۔1اگست (اے پی پی) وزیراعظم یوتھ پروگرام دے چیئرمین رانا مشہود احمد خان آکھیا جو ملک دی یونیورسٹیاں اچ گرین یوتھ کلب ٻݨا تے نینگراں نال موسمیاتی تبدیلی بارے آگاہی ݙتی ویسی۔ نینگراں کوں بااختیار ٻݨاوݨ کیتے وزیراعظم یوتھ لون سکیم سودھے کئی اقدامات کیتے ڳئن۔ اے ڳالھیں انہاں خمیس کوں ایس ڈی پی آئی ولوں ماحولیاتی تبدیلی اتے نینگراں دا سماجی معاشرے اچ کردار دے موضوع تے سیمینار توں خطاب کریندیں ہوئیں آکھی۔ انہاں آکھیا جو موسمیاتی تبدیلیاں نال نبڑݨ کیتے وزیراعظم یوتھ پروگرام دے تحت گرین یوتھ موومنٹ پروگرام شروع کیتا ڳئے۔ پورے ملک دی 137 یونیورسٹیاں اچ گرین یوتھ کلب ٻݨائے ڳئن۔ ساری 268 یونیورسٹیاں اچ کلب ٻݨائے ویسن۔ ایندے علاوہ سکولاں اتے کالجاں اچ وی یوتھ گرین کلب ٻݨائے ویسن۔ سیمینار توں دولت مشترکہ دی سیکرٹری جنرل پیٹریشیا سکاٹ لینڈ اتے وزیراعظم دی رابطہ کار برائے موسمیاتی تبدیلی رومینہ خورشید عالم وی خطاب کیتا۔
