اسلام آباد۔1اگست (اے پی پی) نائب وزیراعظم تے وزیرخارجہ سینیٹر محمد اسحاق ڈار آکھیا جو پاکستان معاشی ترقی اتے استحکام آلے پاسے ویندا پئے، ڳھٹ وسائل دے باوجود ترقیاتی منصوبیاں تے کم تھیندا پئے۔ اے ڳالھیں انہاں خمیس کوں سکیورٹیز اینڈ ایکسچینج کمیشن آف پاکستان (ایس ای سی پی) دی ہیڈ آفس بلڈنگ دے منڈھ بدھݨ بارے تھیوݨ آلی تقریب توں خطاب کریندیں ہوئیں آکھی۔ ایں موقع تے وزیرخزانہ تے محصولات سینیٹر محمد اورنگزیب، چیئرمین ایس ای سی پی عاکف سعید اتے ایس ای سی پی دے بانی چیئرمین شمیم احمد خان وی موجود ہن۔ نائب وزیراعظم آکھیا جو ملک دی معاشی ترقی کیتے مواقع موجود ہن۔ اساں ہر قسم دے چیلنجز نال نبڑدے پئیوں۔ انہاں آکھیا جو وزیراعظم محمد شہبازشریف دی قیادت اچ حکومت آپسی تجارت دی پالیسی تے ٹردی پئی اے۔ پاکستان سٹاک مارکیٹ خطے اچ ساریاں توں بہتر ویندی پئی اے۔ انہاں آکھیا جو وزیراعظم دی ساری توجہ معاشی اصلاحات تے تجارت دے ودھارے تے اے، ملکی برآمدات دا فروغ اساݙی حکومت دا بنیادی ایجنڈا اے۔ انہاں آکھیا جو سکیورٹیزاینڈ ایکسچینج کمیشن (ایس ای سی پی)ہیڈ آفس بلڈنگ دی تعمیر مقررہ مدت اچ کیتی ویسی۔ ایں عمارت کیتے پلاٹ دی منظوری 2017 اچ اساݙی حکومت ݙتی ہئی۔ نائب و زیراعظم سینیٹر محمد اسحاق ڈار آکھیا جو اساݙے 2016 دے دور اچ ملک دی ترائیں سٹاک مارکیٹس کوں ضم کیتا ڳئیا۔ تقریب اچ نائب وزیراعظم سینیٹر محمد اسحاق ڈار وزیرخزانہ و محصولات سینیٹر محمد اورنگزیب، چیئرمین ایس ای سی پی عاکف سعید اتے ٻئے دے رَلے ایس ای سی پی ہیڈ آفس بلڈنگ دا منڈھ بدھݨ دی تختی دی نقاب کشائی کیتی۔
