رحیم یارخان ۔ 01 اگست (اے پی پی) رحیم یارخان پولیس دی کچہ اچ کامیاب کارروائی اچ چار ڈاکواں دی ہلاکت دے بعد جاری مقابلے اچ ترائے پولیس اہلکار شہید تھی ڳئے۔ پولیس دے ترجمان موجب کچہ پولیس مقابلے اچ چار خطرناک ڈاکواں دی ہلاکت اتے چار دے زخمی تھیوݨ تے ڈاکواں ساتھیاں دا بدلہ ڳھنݨ کیتے بھونگ کچہ اچ پولیس پکٹ تے فائرنگ کر ݙتی۔ اطلاع ملدیں ای پولیس دی نفری کچہ بھونگ موقع تے پڄ ڳئی۔ ڈاکواں دی فائرنگ پاروں عقب شہر بھونگ کچہ پکٹ تے تعینات 3 پولیس اہلکار موقع تے شہید تھی ڳئے۔ شہید تھیوݨ آلیاں اچ پنجاب کنسٹیبلری دے جہانگیر ،امتیاز اتے طارق شامل ہن ۔ ڈی پی او عمران احمد ملک دی ہدایت تے پولیس دی بکتر بند گاݙیاں دے رلے ڈاکواں دی ڳول جاری اے۔ ڈی پی او رحیم یارخان عمران احمد ملک آکھیا جو پولیس شہیداں دی قربانیاں رائیگاں نہ ونجݨ ݙیسی۔ عمران احمد ملک آکھیا جو عوام دی جان تے مال دی حفاظت اتے کچہ کریمنلز دی سرکوبی پولیس دا مشن اے۔
