اسلام آباد۔1اگست(اے پی پی) دولت مشترکہ دی سیکرٹری جنرل پیٹریشیا سکاٹ لینڈ آکھیے جو پاکستانی نینگراں اپݨی تخلیقی صلاحیتاں توں موسمیاتی بحران دے باوجود اپݨے مستقبل کوں روشن بݨا سڳدن ، نینگراں کوں مصنوعی ذہانت دی ودھدی ہوئی معاشی صلاحیت توں فیدہ چاوݨ سانڳے جدید ٹیکنالوجی اچ مہارت حاصل کرݨی چاہیدی اے۔ او اتھاں پالیسی ادارہ پائیدار ترقی دے اہتمام اتے وزیراعظم دے نینگراں دے پروگرام اتے وزارت موسمیاتی تبدیلی اتے ماحولیاتی ہم آہنگی دے تعاون توں منعقدہ سمپوزیم توں خطاب کریندیاں پیاں ہن ۔ اے سمپوزیم پاکستان انسٹی ٹیوٹ آف پارلیمنٹری سٹڈیز (پی آئی پی ایس) اچ منعقد تھیا۔ وزیراعظم دی معاون موسمیاتی تبدیلی رومینہ خورشید عالم مہمان خصوصی ہن جݙاں جو کامن ویلتھ دی سیکریٹری جنرل پیٹریشیا سکاٹ لینڈ اتےچیئرمین وزیراعظم یوتھ پروگرام (پی ایم وائی پی) رانا مشہود احمد خان کلیدی خطاب کیتا ۔تقریب اچ کینیڈا دی ہائی کمشنر لیسلی سکانلون اتے اقوام متحدہ دے ترقیاتی پروگرام (یو این ڈی پی) دے نمائندے سیموئیل رزک وی موجود ہن ۔پیٹریشیا سکاٹ لینڈ اپݨے خطاب اچ آکھیے جو نینگر نسل موسمیاتی تبدیلی دے بدترین اثرات دا سامݨا کرݨ آلی پہلی نسل اے۔انہاں آکھیے اوکھ دا شکار قوماں تے موسمیاتی تباہ کاریاں دا سارا ٻوجھ پاوݨ انصاف کائنی ۔انہاں آکھیے مصنوعی ذہانت عالمی معیشت اچ 15.7 ٹریلین ڈالر دا ودھارا کریسی تے نینگراں کوں ایں توں فیدہ چاوݨا چاہیدے ۔ انہاں آکھیے دولت مشترکہ سلیکون ویلی دے نال رل تے مصنوعی ذہانت دی اکیڈمی تیار کیتی اے تاں جو نینگراں کوں تربیت ݙتی ونڄ سڳسی ۔ایندے توں پہلے ایس ڈی پی آئی دے ایگزیکٹو ڈائریکٹر ڈاکٹر عابد قیوم سلہری اپݨے استقبالیہ کلمات اچ آکھیے جو ایس ڈی پی آئی آزاد تھنک ٹینک دی حیثیت نال خود کوں ھک شیڈو حکومت دے طور تے پیش کریندے۔ڈاکٹر سلہری آکھیے مصنوعی ذہانت اتے موسمیاتی تبدیلی مستقبل اچ روزگار دے موقع کوں متاثر کریسی ،تاں جو، کامن ویلتھ سیکرٹریٹ اپݨے 56 رکن ملکاں نال تعاون دیاں کوششاں کرسڳدے۔ وزیراعظم دی کوآرڈینیٹر موسمیاتی تبدیلی رومینہ خورشید عالم آکھیے جو سمپوزیم جیہے فورمز نینگراں دی آواز ودھاوݨ اچ اہم کردار ادا کریندن ۔ پاکستانی نینگر باصلاحیت اتے پرعزم ہن تے کہیں وی چیلنج نال نبݨ سڳدن صرف انہاں کوں سدھی رہنمائی دی لوڑھ اے ۔ چیئرمین پی ایم وائی پی رانا مشہود احمد خان آپݨے کلیدی خطاب اچ ڈونرز اتے شراکت داراں دا شکریہ ادا کریندے آکھیے نینگراں دی بااختیاری ہی اڳوں ودھݨ دا رستہ اے ۔ وزیراعظم نوجوان پروگرام دے تحت 268 اچوں 137 یونیورسٹیاں اچ گرین کلب بݨائے ڳئن جنہاں دا دائرہ کار ودھایا ویسی ۔کینیڈین ہائی کمشنر، لیسلی سکانلون آکھیے موسمیاتی تبدیلی دے حوالے نال عمل اچ نینگراں دی آواز کوں مرکزیت ݙیوݨ ضروری اے کیوں جو ایندے اثرات نال ساریں توں زیادہ متاثر تھیندن ۔ انہاں ایس ڈی پی آئی دے ایگزیکٹو ڈائریکٹر ڈاکٹر عابد قیوم سلہری کوں کوپ 29 آذربائیجان دی انٹرنیشنل ایڈوائزری کمیٹی دے رکن نامزد تھیوݨ دی مبارخ ݙتی ۔ اقوام متحدہ دے ترقیاتی پروگرام (یو این ڈی پی) دے نمائندہ سیموئل رزک آکھیے موسمیاتی تبدیلی دے خلاف کوششاں اچ نینگراں دے کردار تے انہاں دے ݙر کوں منݨ اہم اے ۔ کیوں جو موسمیاتی تبدیلی مستقبل اچ ھک وݙا چیلنج بݨݨ آلی اے ۔ یونیسف دی چیف آف واش، سنڈی کشنر آکھیے پاکستان موسمیاتی تبدیلی دے حوالے نال پنجویں ساریں توں ودھ خطرے اچ موجود ملک اے جتھاں ٻال تے تریمتاں ساریں توں زیادہ متاثر تھیندن چھیکڑ اچ وزیراعظم دی معاون رومینہ خورشید عالم، کامن ویلتھ دی سیکرٹری جنرل پیٹریشیا سکاٹ لینڈ، ایس ڈی پی آئی دے ایگزیکٹو ڈائریکٹر ڈاکٹر عابد قیوم سلہری اتے ٻئیں یونیسف پاکستان دی طرفوں ”کوپ ان مائی سٹی“ اقدام دا آغاز کیتا
