اسلام آباد۔1اگست(اے پی پی) وزیراعظم محمد شہباز شریف نال وانگ فوکانگ دی سربراہی اچ چین دے 12 رکنی اعلی سطحی وفد خمیس کوں اتھاں ملاقات کیتی۔ ملاقات اچ نائب وزیراعظم و وزیر خارجہ اسحاق ڈار، وفاقی وزراء سید محسن نقوی، احسن اقبال، محمد اورنگزیب، احد خان چیمہ، معاون خصوصی طارق فاطمی، وزیراعظم دے کوآرڈینیٹر رانا احسان افضل دے علاوہ چینی سفیر جیانگ زائیڈونگ اتے متعلقہ اعلی حکام شرکت کیتی۔ وزیراعظم آفس دے میڈیا ونگ توں جاری بیان موجب چینی وفد وزیراعظم دے دورہ چین دے بعد چین دے پاکستان اچ مختلف شعبیں اچ تعاون اتے سانجھ کیتے پاکستان تے دورے تے ہے۔ 12 رکنی چینی وفد اچ 10 مختلف وزارتاں دے نمائندے شریک ہن۔وزیراعظم چینی قیادت صدر شی جن پنگ اتے وزیراعظم لی چیانگ دا خصوصی شکریہ ادا کریندے چینی وفددا خیر مقدم کیتا۔چینی ماہرین دا اعلی سطحی وفد پاکستان اچ چینی سرمایہ کاری، سی پیک دے ݙوجھے مرحلے تے سانجھ تے تعاون اتے پاکستان دی برآمدات ودھاوݨ تے آپݨی صلاح ݙیسی ۔ چینی وفد پاکستان اچ مختلف وزارتاں، شعبے دے ماہرین نال ملاقاتاں تے مختلف جہیں دا دورہ کریسی چینی وفد انفارمیشن ٹیکنالوجی، زراعت، صنعت، سرمایہ کاری، توانائی، معدنیات تے کان کنی، سپیشل اکنامک زونز اتے مواصلات دے شعبیں اچ تعاون ودھاوݨ تے تجویز ݙیسی ۔ وزیراعظم اپݨی ابتدائی ڳالھ مہاڑ اچ وفد کوں پاکستان دے مختلف شعبیں اچ سرمایہ کاری دی استعداد دا ݙسائے ۔ چینی وفد دے سربراہ آکھیے سانجھے تکنیکی تعاون نال پاک-چین سٹریٹیجک تعلقات مزید تکڑے تھیسن ،مثالی مہمان نوازی تے پاکستان دے مشکور ہیسے
