اسلام آباد۔1اگست(اے پی پی) وفاقی وزیرخزانہ ومحصولات سینیٹرمحمداورنگزیب آکھیے وزارت خزانہ اتے وزارت بجلی توانائی شعبہ دے مسئلیں دے پکے حل سانڳے متعلقہ شراکت داراں نال رل تے کم جاری رکھیسن ۔ انہاں اے ڳالھ وزیر بجلی سردار اویس احمد خان لغاری دے رلے پورٹ قاسم الیکٹرک پاور کمپنی دے وفد نال ملاقات اچ آکھی اے ۔ وفددی قیادت کمپنی دے چیف ایگز یکٹو آفیسر مسٹر لیانگ کریندے پئے ہن ۔ پورٹ قاسم الیکٹرک پاور کمپنی دے وفد وزیر خزانہ کوں بریفنگ ݙیندے کمپنی دے آپریشنز تے واجب الادا وصولیاں پاروں مسئلے ݙسائے۔ وفد ایں ڳالھ تے زور ݙتا جو پاور چائنا چین دی ھک وݙی سرکاری کمپنی اے تے پاکستان دی توانائی دی مارکیٹ اچ کلیدی سرمایہ کار اے۔ کمپنی حکومت پاکستان نال رل تے کم اتے بجلی دے شعبہ دی بہتری اچ آپݨا کردار نبھیندی رہسی وزیر خزانہ وفد دی تجویزاں دا خیر مقدم کیتے تے آکھیے حکومت پاکستان پورٹ قاسم الیکٹرک پاور کمپنی تے ٻیاں چینی کمپنیاں دی طرفوں پاکستان اچ بجلی دے شعبہاچ سرمایہ کاری کوں منیندی اے تے ایندی تعریف کریندی اے انہاں آکھیے وزارت خزانہ اتے وزارت توانائی پاور سیکٹر دے مسئلیں دے پکے حل ڳولݨ تے انہاں تے عمل کرݨ سانڳے سارے متعلقہ شراکت داراں نال ہم آہنگی نال کم جاری رکھیسن ۔وفد تعمیری صلاح تے تعاون تے وزیر خزانہ دا شکریہ ادا کیتا۔ وفد دے سربراہ بجلی دے شعبہ دے مسئلے مکاوݨ دے طریقے تے کم کرݨ سانڳے کمپنی دے مکمل تعاون دی پیشکش وی کیتی
