اسلام آباد۔1اگست(اے پی پی) وزیراعظم محمد شہباز شریف تہران اچ حماس پولیٹیکل بیورو دے سربراہ اسماعیل ہنیہ تے حملے کوں عالمی قوانین کوں پیراں تے لتاڑݨ دے مترادف قرارݙیندے آکھیے پاکستان سودھے پوری دنیا ایں ݙراکلے واقعہ دی مذمت کیتی اے، نیتن یاہو تے اسرائیلی فوج کھلے عام درندگی اتے تباہی پھیرݨ تے لہہ آئن ، اے صورتحال ترقی یافتہ قوماں سانڳے وی ھک چیلنج اے،او فلسطین دی صورتحال متعلق اتحادی پارلیمانی جماعتاں دے اجلاس توں خطاب کریندے پئے ہن ۔ وزیراعظم آکھیے فلسطین اچ خون دی ہولی کھݙی ویندی پئی اے۔ گزریل 9 مہینے توں ہݨ تئیں ٻالاں سودھے 40 ہزار توں ودھ فلسطینی شہید کیتے ڳئن، ہسپتالاں کوں پورا تباہ کرݙتا ڳئے تے ہر آئے ݙینھ غزہ اچ لاشیں ڈھائیاں ویندیاں پئن ، شہراں دے شہر تے محلاں دے محل ڈھا ݙتے ڳئن تے ہر ݙینھ ٹیلی ویژن تے ایجھے ݙراکلے منظر ݙیکھݨ کوں ملدی جو تاریخ اچ ایہو سویں واقعات شاید ہی کݙاہیں کہیں ݙٹھے ہوون ۔ وزیراعظم آکھیے کل تہران اچ جیڑھا واقعہ تھئے میں سمجھداں پوری دنیا ایندی شدید ترین الفاظ اچ مذمت کیتی اے ،ایران دی علاقائی حدود دی خلاف ورزی کریندے راکٹ حملے دے ذریعے اسماعیل ہنیہ کوں شہید کیتا ڳئے تے ایں حوالے نال عالمی قوانین کوں پیراں تلے لتاڑیا ڳئے ،کہیں چیز دا لحاظ نی کیتا ڳیا تے اسماعیل ہنیہ جنھاں دے ٻال تے پوترے وی پہلے شہید کرݙتے ڳئن ،ہݨ انہاں کوں اتھاں شہید کیتا ڳئے ایجھی سفاکی دی مثال نی ملدی ، پاکستان سودھے ترکیہ،چین،روس،ملائیشیا اتے قطر دی طرفوں ایں واقعے دی پرزور مذمت کیتی ڳئی ، ایں واقعے تے پوری دنیا اشکبار اے،ایں قسم دی درندگی تے دنیا جے چپ رہے تاں اے لمحہ فکریہ اے۔وزیراعظم آکھیے ایں واقعے تے اساکوں قوم دیاں آواز بݨ تے ایندی عکاسی کرݨی اے ۔ انہاں آکھیے ایں قسم دی انتہاپسندی اتے دہشت گردی دی جتنی مذمت کیتی ونڄے گھٹ ہوسی عالمی اداریں غزہ دی صورتحال تے جیڑھیاں قرارداداں منظور کیتن ، اسرائیل دی طرفوں انہاں دیاں دھجیاں اݙائیاں ڳئن ، انہاں عالمی عدالت انصاف دے فیصلے دا خیرمقدم کریندے آکھیے عالمی عدالت انصاف اسرائیلی بربریت کوں نسل کشی قرارݙتے ایندی مذمت کیتی اے ، ایندے باوجود اسرائیل دے ہتھ نی روکیے ونڄ سڳیے ، نیتن یاہو تے اسرائیلی فوج کھلے عام درندگی تے تباہی پھیرݨ تے لہہ آئن ، اے صورتحال ترقی یافتہ قوماں سانڳے ھک چیلنج اے جو کیویں ایندے نال نبڑوں۔وزیراعظم آکھیے آئرلینڈ اتے سپین دے شکر گزار ہیسے جنہاں ایں مسئلے کوں چاتے اتے ݙوریاستی حل دی حمایت کیتی اے، میں آئرلینڈ دے وزیراعظم کوں ٹیلی فون کرتے انھاں دا شکریہ ادا کیتے
