اسلام آباد۔1اگست(اے پی پی) حکومت اتے اتحادی جماعتاں فلسطینی عوام نال اظہار یکجہتی تے اسرائیلی بربریت دی ݙوٹوک مذمت کریندے صبحائیں جمعہ کوں پاکستان اچ سوڳ دا ݙینھ مناوݨ ،اسماعیل ہانیہ شہید دی غائبانہ نماز جنازہ پڑھݨ ، فلسطین کوں امدادی سامان دی ترسیل جاری رکھݨ تے پارلیمنٹ اچ فلسطینیاں نال مکمل یکجہتی کرݨ سانڳے خصوصی قرارداد پیش کرݨ دا فیصلہ کیتے جݙاں جو عالمی برادری سودھے اقوام متحدہ توں مطالبہ کیتا ڳئے جو او آپݨی چُپ کوں بھنے تے صیہونی طاقتاں دے ہتھوں مظلوم فلسطینیاں دی جاری نسل کشی وختی روکن تے اسرائیل کوں جنگی جرائم اتے فلسطینیاں تے ظلم تے پہاڑ تروڑݨ تے انصاف دی کچاری اچ گھن آون ۔ وزیراعظم محمد شہباز شریف دی صدارت اچ نہتے فلسطینیاں تے اسرائیل دے ودھدے ظلم تے حکومت تے اتحادی جماعتاں دا مشاورتی اجلاس اسلام آباد اچ تھیا ۔وزیراعظم آفس دے میڈیا ونگ توں جاری بیان موجب اجلاس اچ پاکستان مسلم لیگ ن، پاکستان پیپلز پارٹی، بلوچستان عوامی پارٹی، متحدہ قومی موومنٹ، استحکام پاکستان پارٹی، پاکستان مسلم لیگ ق، پاکستان مسلم لیگ ضیاء، نیشنل پارٹی دے سربراہان و سینئر نمائندے شریک تھئن ۔وزیراعظم اجلاس اچ شرکت تے شرکاء دا شکریہ ادا کیتے۔فلسطین دی اڄوکی صورتحال تے حکومت اتے اتحادی جماعتاں دے مشترکہ اعلامیہ موجب شرکاء مشترکہ طور تے فلسطین اچ 9 مہینے سانڳے نہتے لوکاں تے جاری اسرائیلی ظلم تے بربریت تے کاوڑ کیتی ۔ شرکاء اسرائیلی ظلم دی پرزور مذمت کریندے نہتے فلسطینی بھیݨ بھراویں نال اظہار یکجہتی اتے تہران اچ حماس دے لیڈر اسماعیل ہانیہ دی شہادت تے ݙکھ تے افسوس کیتا ڳئے ۔اجلاس اتفاق کیتے جو اے واقعہ فلسطینیاں تے جاری ظلم و بربریت بند کرݨ تے خطے اچ امن دے قیام دیاں کوششاں کوں سبوتاژ کرݨ دی دانستہ سازش اے،ایجھے واقعات دنیا دا امن تباہ کرݨ دے نال خطے اچ مزید کشیدگی دی فضاء کوں ہوا ݙیندن۔وزیراعظم فلسطین اچ جاری اسرائیل دے ریاستی ظلم و بربریت کوں امت مسلمہ سانڳے المیہ قرارݙتے ۔اعلامیہ اچ پرزور مطالبہ کیتا ڳئے جو نہتے فلسطینیاں دی وختی انسانی ہمدردی دے تحت امداد تئیں رسائی یقینی بݨائی ونڄے ۔اجلاس اچ فیصلہ کیتا ڳئے جو پاکستان فلسطین کوں امدادی سامان دی ترسیل جاری رکھیسی تے مظلوم فلسطینی بھیݨ بھراویں دی طبی امداد سانڳے مؤثر اقدامات چیسی جیں دے تحت فلسطینی زخمیاں کوں علاج معالجے سانڳے پاکستان گھن آیا ویسی ۔اجلاس اچ فیصلہ کیتا ڳئے فلسطینی میڈیکل طلباء کوں آپݨی تعلیم جاری رکھݨ سانڳے پاکستان دے میڈیکل کالجز اچ امدادی بنیاداں تے داخلہ ݙتا ویسی ۔ اجلاس اپݨے فلسطینی بھیݨ بھراویں نال یکجہتی تے اسرائیلی بربریت دی ݙوٹوک مذمت دے طور تے صبحائیں پاکستان اچ سوڳ دا ݙینھ مناوݨ دا فیصلہ کیتے ۔اجلاس اچ کل بعد نمازِ جمعہ پورے ملک اچ اسماعیل ہانیہ شہید دی غائبانہ نمازِ جنازہ ادا کرݨ تے پارلیمنٹ اچ فلسطین نال مکمل یکجہتی سانڳے ھک خصوصی قرارداد پیش کرݨ دا فیصلہ کیتا ڳئے ۔ شرکاء قرارݙتے جو فلسطین اچ جاری نسل کشی اتے ریاستی ظلم و بربریت توں اسرائیل اقوام متحدہ دی قرارداداں، عالمی عدالت انصاف دے فیصلیں تے عالمی قوانین دی دھجیاں اݙیندا پئے، بین الاقوامی برادری ایں تے چپ کیتی ہوئی اے ۔شرکاء مطالبہ کیتے جو پوری عالمی برادری کوں مصلحت توں نکل تے اے ظلم بربریت روکݨ سانڳے واضح اتے ݙو ٹوک موقف اپناوݨا ہوسی ، نتاں عالمی قوانین اتے اداریں دی حیثیت آندیاں نسلاں سانڳے ھک سوالیہ نشان بݨ تے رہ ویسی ۔ اجلاس اچ عالمی برادری بشمول اقوام متحدہ توں مطالبہ کیتا ڳئے جو او آپݨی چپ کوں بھن ݙیون تے صہیونی طاقتاں دے ہتھوں مظلوم فلسطینیاں دی جاری نسل کشی وختی روکن تے اسرائیل کوں جنگی جرائم اتے فلسطینیاں تے ظلم دے پہاڑ بھنݨ تے انصاف دے کٹہرے اچ کھڑا کرن
