اسلام آباد۔2اگست (اے پی پی) وزیراعظم محمد شہبازشریف اسماعیل ہنیہ دے قتل دی مذمت کریندیں ہوئیں آکھیا جو فلسطین اتے غزہ دی صورتحال تے عالمی اداریاں دا ضمیر جاگݨا چاہیدے، آئی پی پیز دی کپیسٹی پیمنٹ سودھے بجلی دے شعبے دے مسئلیاں دے حل بارے کوشش کریندے پئیوں، عوام کوں ریلیف ݙیوݨ کیتے جو تھی سڳدے کریندے پئیوں۔ اے ڳالھیں انہاں جمعے کوں وفاقی کابینہ اچ اجلاس دے شروع تے خطاب کریندیں ہوئیں آکھی۔ وزیراعظم آکھیا جو اسماعیل ہنیہ کوں سفاکی نال ایران اچ شہید کیتا ڳئے، پاکستان، ترکیہ ،ملائیشیا سودھے ٻئے ملکاں ایندی مذمت کیتی اے۔ اتحادی جماعتاں وی ایندی مذمت کیتی اے۔ عالمی اداریاں دا اڄ ضمیر جاگݨا چاہیدے۔ غزہ اتے فلسطین اچ بدترین تباہی تھیندی پئی اے۔ ہک حاملہ تریمت کوں سفاکی نال شہید کیتا ڳئے۔ نماز جمعہ دے بعد اسماعیل ہنیہ دا غائبانہ جنازہ پڑھایا ویسی۔ میں اتے اساݙے وزراء وی جنازے اچ شریک تھیسن۔ وزیراعظم آکھیا جو بجلی دے بحران دے حل کیتے کوششاں جاری ہن۔ اساݙی سیاست عوامی خدمت اے۔ سابق وزیراعظم نواز شریف دے دور اچ 20،20 گھنٹے دی لوڈ شیڈنگ کوں ختم کیتا۔ سی پیک دے تحت بجلی دے منصوبے لاتے ڳئے۔ چار ایل این جی پاور پلانٹ لاتے ڳئے۔ پںج ہزار میگاواٹ بجلی ٻݨائی ڳئی۔ آئی پی پیز دی کپیسٹی پیمنٹ سودھے بجلی دے شعبے دے مسئلیاں دے حل بارے کوشش کریندے پئیوں، عوام کوں ریلیف ݙیوݨ کیتے جو تھی سڳدے کریندے پئیوں۔ عوام دی اوکھ بارے پتہ اے۔ ہک مخصوص جماعت دی خیبرپختونخواہ اچ ݙاہ سال حکومت اے، اوں اتھ کتنے منصوبے لاتن، ڈیم ٻݨائن، اتے پن بجلی دے منصوبیاں تے کتنی سرمایہ کاری کیتی اے؟ ڳالھیں کرݨ سوکھا اے کم کرݨ اوکھا اے۔ بلوچستان کیتے شمسی توانائی دا ستر ارب روپے دا منصوبہ شروع کریندے پئیوں جئیں اچ 55 ارب روپے وفاقی اتے باقی صوبہ ݙیسی۔ انہاں آکھیا جو بجلی چوری روکݨ کیتے نشابر کم کیتن۔ نگراں حکومت وی ایں بارے چنڳے کم کیتے ہن۔ ایں معاملے تے سپہ سالار دا عزم نشابر اے۔ پنجاب اتے سندھ بجلی چوری روکݨ کیتے ساتھ ݙیندے پئن۔ انہاں آکھیا جو تنخواہ دار طبقے تے ٹیکس ودھایا ڳئے ایندا احساس اے۔ وزیراعظم آکھیا جو 200 یونٹ بجلی استعمال کرݨ آلیاں کوں رعایت ݙتی ویسی۔ 500 یونت تئیں بجلی استعمال کرݨ آلیاں کوں ریلیف ݙیوݨ کیتے غور کریندے پئیوں۔ بجٹ اچ صنعتاں کیتے بجلی دا اڳھ اچ ساݙھے اٹھ روپے فی یونٹ ڳھٹکی کیتی ڳئی اے۔ حکومت آئی پی پیز تے تیزی نال کم کریندی پئی اے، جلدی انہاں دا معاملہ حل تھی ویسی۔ وزیراعظم اکھیا جو عوام کوں ریلیف ݙیوݨ کیتے جو تھی سڳدے کریندے پئیوں۔
