اسلام آباد۔2اگست(اے پی پی)پنجاب اچ سرائیکی زبان دی ترقی کیتے نویکلا اتے تاریخی اقدام کریندے ہوئے پہلی واری سرائیکی کوں یارھویں ٻارہویں دے نصاب اچ باقاعدہ شامل کر ڳھدا ڳئے، ایں سانڳے کتاب باقاعدہ چھپݨ کوں تیار اے۔ ݙسایا ڳئے جو بہاء الدین زکریا یونیورسٹی ملتان اچ پنجاب ٹیکسٹ بک بورڈ، محکمہ سکول ایجوکیشن جنوبی پنجاب دے ڳانݙھے نال “سرائیکی ٹیکسٹ بک دی تکمیلی ورکشاپ” تھئی جیندے مہمان خصوصی رکن قومی اسمبلی اتے رہنما پاکستان پیپلزپارٹی سید علی حیدر گیلانی ہن۔ ورکشاپ اچ وائس چانسلر ( بی زیڈ یو) پروفیسر ڈاکٹر محمد علی شاہ وی موجود ہن۔ اے کتاب مرتب کرݨ کیتے سلیبس کمیٹی اچ شامل سرائیکی ماہرین تعلیم اتے دانشور عصمت اللہ شاہ، سلیمان سہو اتے ڈاکٹر ایاز رند وی موجود ہن جنہاں ݙسایا جو کتاب چھپݨ کوں تیار اے اتے اے کتاب تیکھے چھپ تے آویسی جیڑھی یارہویں ٻارہویں دے آندے سیشن اچ باقاعدہ بطور نصاب پڑھائی ویسی۔ تقریب اچ مہمان خصوصی نصاب اچ نویں رلائی ونڄݨ آلی سرائیکی کتاب دے مرتبین عصمت اللہ شاہ، سلیمان سہو اتے ڈاکٹر ایاز رند کوں تعریفی اسناد وی ونݙیان ڳن۔ ورکشاپ نال خطاب کریندے مہمان خصوصی علی حیدر گیلانی آکھیا جو نصاب اچ رلاوݨ نال سرائیکی زبان دی ترویج و ترقی اچ مدد ملݨ سودھا طلبا کوں اپݨی زبان اچ تعلیم دی اہمیت سمڄھاوݨ اتے ڄڳ نال مقابلہ کرݨ دی صلاحیت پیدا تھیسی۔
ورکشاپ اچ ڈاکٹر عبید اللہ سیکرٹری سکول ایجوکیشن جنوبی پنجاب، ڈاکٹر نوید شہزاد مرزا ڈائریکٹر پنجاب ٹیکسٹ بک بورڈ، سیکرٹری پنجاب ٹیکسٹ بک بورڈ عبدالرزاق اتے ایڈووکیٹ مظفر علی شاہ سودھا ڈائریکٹر سرائیکی ایریا سٹڈی سنٹر ملتان وی شرکت کیتی۔
