اسلام آباد۔3اگست(اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے جو پاکستان مقبوضہ جموں و کشمیر دے عوام دی حق خود ارادیت دی جنگ اچ حمایت جاری رکھیسی ، پاکستان اپݨا قومی فریضہ سمجھدے ہوئیں کشمیری عوام کوں انصاف ݙیوݨ سانڳے ہر عالمی فورم تے آواز چاتی اے تے چیندا رہ ویسی ۔ اے ڳالھ انہاں پاکستانی سفارت خانہ برلن دے اہتمام نال یوم استحصال کشمیر دے موقع تے مقبوضہ کشمیر دے عوام نال یکجہتی سانڳے منعقدہ ویبینار توں بذریعہ ویڈیو لنک خطاب کریندے آکھی ۔ وفاقی وزیر اطلاعات آکھیے بھارت کشمیری عوام دے حق خود ارادیت کوں کمزور کرݨ سانڳے کشمیری آبادی اچ تبدیلیاں گھن آوݨ دی کوشش کریندا پئے ، 5 اگست 2019ءکوں بھارت غیر قانونی طور تے زیر تسلط مقبوضہ جموں و کشمیراچ یکطرفہ کارروائیاں دا آغاز کیتے، انھاں کارروائیاں دا مقصد کشمیری عوام کوں بے اختیار کرݨا، حق رائے دہی توں محروم کرݨ تے انہاں کوں آپݨی ہی سرزمین توں بے دخل کرݨا اے۔ انہاں آکھیے اڄ بھارت دنیا کوں اے ݙساوݨ دی کوشش کریندا پئے جو جموں تے کشمیر ایندی سرزمین دا غیر متنازعہ حصہ اے تاں جواے بھارت ہی ہئی جیڑھا جموں و کشمیر دے مسئلے کوں سلامتی کونسل اچ گھن تے ڳیا ، سلامتی کونسل اچ جموں و کشمیر دی متنازعہ حیثیت کوں عالمی سطح تے منیا ڳئے انہاں آکھیے بھارت دی طرفوں مقبوضہ جموں و کشمیر تے وحشیانہ قبضہ نہ صرف عالمی قوانین دی خلاف ورزی اے بلکہ انسانی حقوق دی عالمی سطح تے منیے ڳئے اصولاں دی وی تضحیک اے۔ مقبوضہ جموں و کشمیر دے عوام بھارت دے غیر قانونی اتے غاصبانہ تسلط دے خلاف لازوال قربانیاں ݙیندے پئن۔ وفاقی وزیر آکھیے پاکستان مقبوضہ کشمیر دے عوام دی حق خود ارادیت دی جنگ اچ حمایت جاری رکھیسی ، حکومت پاکستان کشمیری عوام دی حمایت سانڳے متفقہ قرارداد منظور کر چکی اے جیں اچ ہندوتوا حکومت دے انتہا پسندانہ عزائم تے تشویش کیتی اے، پاکستان اپݨا قومی فریضہ سمجھدے کشمیری عوام کوں انصاف ݙیواوݨ سانڳے ہر عالمی فورم تے آواز چاتی اے تے چیندا رہ ویسی ۔ انہاں آکھیے ساݙا آپݨے کشمیری بھیݨ بھراویں نال وعدہ اے جو اساں انہاں دی ہرفورم تے آواز او تئیں گھن ویسوں جݙاں تئیں عالمی برادری ایں تے ایکشن نی گھندی ،عالمی برادری دی ذمہ واری اے بھارت تے انسانی حقوق دی سنگین خلاف ورزیاں تے مقبوضہ جموں و کشمیر تے 5 اگست 2019ء توں ہݨ تئیں یکطرفہ اتے غیر قانونی زیر تسلط مکاوݨ سانڳے زور ݙیوےٖ ۔ ویبینار توں برلن اچ پاکستانی سفیر ثقلین سیدہ، لارڈ قربان حسین، پرشین سوسائٹی برلن دے اعزازی صدر مسسٹر وولکر تسپکے، ممتاز کشمیری رہنماواں شمیم شال، مشعال ملک، الطاف حسین وانی اتے علی رضا سید وی خطاب کیتا اتے بھارتی مقبوضہ جموں و کشمیر دی سنگین صورتحال تے روشنی پاتی
