اسلام آباد۔3اگست (اے پی پی) پیس اینڈ کلچرل آرگنائزیشن دی سربراہ اتے حریت رہنما یاسین ملک دی ذال مشعال ملک آکھیے بھارت دی طرفوں تر جبر و استبداد تے 5 اگست 2019 کوں بھارتی غیر قانونی زیر تسلط جموں و کشمیر دی خصوصی حیثیت مکاوݨ دے یکطرفہ اقدام دے باوجود کشمیریاں دی اپݨے جائز حق خودارادیت سانڳے جدوجہد جاری اے تے انہاں دا جذبہ حریت گھٹ کائنی تھیا ، دنیا کوں آر ایس ایس جیہی دہشتگرد تنظیماں تے پابندی لاوݨی چاہیدی اے ،کشمیر اتے فلسطین دے جھیڑے دا پرامن حل نہ نکلیا تاں فلسطین وانڳوں کشمیر اچ وی ھک واری ول مسلح جدوجہد شروع تھی سڳدی اے جیں توں دنیا دے امن کوں خطرہ ہوسی، بھارت نال جݙاں وی پاکستان کوئی ڳالھ مہاڑ کریسی تاں او حریت قیادت کوں ایندے اچ رلیسی انہاں دے بغیر کہیں نال وی ڳالھ نی تھی سڳدی۔ ریڈیو پاکستان کوں انٹرویو اچ انہاں آکھیے 5 اگست 2019دے بھارتی اقدام تے عالمی سطح تے تے خود بھارت اچ ٻہوں ڳالھ مہاڑ تھئی ۔ ایں اقدام دی آڑ اچ جیویں ریٹائرڈ آرمی افسراں سودھے غیر ریاستی باشندیں کوں کشمیر اچ آباد کیتا ویندا پئے اتھاں کالے قوانین لاگو ہن، اے اقدامات کشمیر تےغیرقانونی قبضے ودھاوݨ سانڳے چاتے ویندے پئن ، کشمیر توں گرفتار تھیوݨ آلیں کوں ہݨ بھارت دی کہیں وی جیل اچ رکھیا ویندا پئے ، بھارتی سارے اقدامات دے باوجود کشمیریاں دا جذبہ حریت گھٹ کائںی تھیا ، جبر و استبداد دے بے شماراقدامات چاوݨ ، کشمیر دی زمین غیر ملکیاں کوں لیز تے ݙیوݨ تے حالات معمول تے گھن آوݨ دا غلط تاثر ݙیوݨ دے باوجود کشمیر اچ تھیوݨ آلی سمٹ دے کوئی خاص مقصد نی ڳھدے ونڄ سڳیے ، کشمیریاں بھارتی اقدامات کوں ݙیکھدے ذہنی طور تے آپݨے آپ کوں تیار کر رکھیے، 5 اگست دے بعد مذہبی جہیں ، سیاحتی جہیں تے جنگلات دی زمین دا براہ راست کنٹرول نئی دہلی سرکار آپݨے ہتھ اچ گھن ڳھدے، اتھاں چاول دی کاشت دے علاقیں دا کنٹرول وی بھارتیاں کوں ݙتا ڳئے ، ملازمتاں تے جامعات اچ کشمیریاں کوں کوٹے توں محروم کیتا ویندا پئے ، کشمیریاں دے بینک اکاؤنٹ سیل کیتے ڳئن ، انھاں دی سفری دستاویزات ضبط کیتیاں ویندیاں پئن جیڑھی افسوس دی ڳالھ اے جݙاں جو قابض سانڳٖ ایندے اچ تاسف دی کوئی ڳالھ کائنی ، بھارتی آئین ، قوانین اتے عالمی قوانین دی وی کشمیر اچ سنگین خلاف ورزیاں جاری ہن۔ انہاں آکھیے کشمیریاں آر ایس ایس وانڳوں کݙاہیں وی کشمیر اچ سیاحت دی غرض نال آوݨ آلیں تے حملہ نی کیتا ، بھارت مذہبی انتہا پسندی دے کارڈ کوں استعمال کرتے کشمیر اچ مذہبی منافرت کھنڈاوݨ دی کوشش کریندا رہیا ۔ جݙاں جو ایندے جواب اچ کشمیریاں کݙاہیں وی ایندا جواب نی ݙتا ۔ مشعال ملک آکھیےکشمیر توں سیب دی پیداوار کوں اتھوں ݙوجھیں علاقیں اچ بھیڄݨ توں روکیا ڳئے جݙاں جو کشمیریاں دا مالی ضیان تھیوے ، 5 سال اچ بھارتی حکومت کشمیر مخالف ایجھے ٻہوں سارے اقدامات چاتن ھک سوال دے جواب اچ انہاں آکھیےمحبوبہ مفتی دے خاندان ہمیشہ بھارتی وراثت کوں اڳوں ودھائے ، کشمیر کوں یونین ٹریٹری بݨاوݨ دے اقدام نال پرجوش ہندوواں کوں ہݨ مایوسی تھئی اے ، بھارت اپݨی بقا سانڳے پچھوں ہٹدا پئے ، محبوبہ مفتی اتےعبداللہ فیملی سودھے بھارت دی ہمدردی رکھݨ آلی قیادت کوں انہاں دی خواہش تے گھراں اچ نظر بند رکھیا ڳئے جݙاں جو بھارت مخالف کشمیری رہنماواں تے ظلم دے پہاڑے ڈھائے ویندے پئن ، سید علی گیلانی دی تدفین نی کرݨ ݙتی ڳئی ، یاسین ملک کوں پھاسی دی سزا سݨائی ڳئی۔ اڄوکے الیکشن اچ کشمیریاں بھارت دی حمایت کرݨ آلی قیادت کوں مسترد کرݙتے، اپݨی بقا سانڳے اے خاندان وقتاً فوقتاً ایجھے اقدامات چیندے رہندن ، ایودھیہ مندر دی تعمیر وانڳوں انہاں 5 اگست دا اقدام وی چاتے ایں توں سیاسی فیدہ چاتا ونڄ سڳے تاں جو او ایندے اچ ناکام رہیے۔ سوال دے جواب اچ انہاں آکھیے بھارت نال جݙاں وی پاکستان کوئی ڳالھ مہاڑ کریسی تاں او حریت قیادت کوں ایندے اچ رلیسی ایندے بغیر نہیں نال ڳالھ نی تھی سڳدی ، بھارت ولوں انتہا پسندانہ اقدامات چاوݨ دے بعد ہݨ نام نہاد سافٹ کارنر دا تاثر ݙیوݨ ہر جاہ ڈسکس تھیندا پئے جو انہاں کوں انہاں اقدامات توں کیا ملیے انہاں دے سارے منصوبے ناکام تھئن، عوام دی اکثریت دی آواز دباوݨ تے انہاں دی خواہشات دا احترام نہ کر تے چاتے ڳئے ظالمانہ اقدامات ایویں مسترد تھی ویندن ایہو جیہے اقدامات بھارت دے نام نہاد سیکولر ازم دے نعرے تے وی سوالیہ نشان ہن۔ جے اے امن دے پاسے نہ ویسن تاں سیاسی آوازاں کوں دٻیندے رہ ویسن ایندا نتیجہ مسلح جدوجہد تے ہی تھیسی ، ماضی دے مقابلے اچ ایں ویلھے حالات ٻہوں خراب ہن ، جے مسلح جدوجہد شروع تھئی تاں ول واپسی کائناں ہوسی ول ایں توں خطے اچ خون خرابہ تھیسی ھک سوال دے جواب اچ انہاں آکھیے 5 اگست دے بعد اقلیتاں کوں نشانہ بݨاوݨ دے حوالے نال قانون سازی وی کیتی ڳئی ، بھارت دی طرفوں چاتے ونڄݨ آلے اقدامات نال آر ایس ایس اتے ہندو توا دے نظریات کوں ودھارا تھئے ایندا دائرہ پورے ملک تئیں کھنڈ چکیے اتھاں امن چاہݨ آلیں کوں دیوار نال لاتا ویندا پئے ، انہاں اقدامات پاروں بھارت پھس ڳئےتے ایندا اے بیانیہ پٹ چکے۔ ھک سوال دے جواب اچ انہاں آکھیے دنیا دی صلاح ہݨ انسانی حقوق دے حوالے نال بدل چکی اے، فلسطین اچ اڄوکی بربریت دے خلاف دنیا اچ احتجاج ݙیکھݨ اچ آئن ، قابضین دے خلاف دنیا اچ ہݨ آوازاں اٹھدیاں پئن فلسطینیاں دے حق اچ خود امریکہ تے ٻئے ملکاں اچ وݙیاں آوازاں اٹھدیاں پئن جے ایندے تے توجہ نہ ݙتی ڳئی تاں وݙیاں جنگاں تھی سڳدن ،ہندوستان دے اپݨے پڑوسی ملکاں نال وی تعلقات وی جھیڑیں دی نظر تھیندے پئن ، انسانی حقوق دی عالمی تنظیماں کشمیر دے اڄوکے واقعات اچ ایں ڳالھ تے اتفاق کیتے جو اتھاں انسانی حقوق دی خلاف ورزیاں تھیندیاں پئن، فلسطین تے کشمیر دے جھیڑیں کوں عالمی امن دے تناظر اچ جے دنیا دے سامݨے پیش کیتا ونڄے تاں اے اہم رہسی ، اسماعیل ہانیہ دی شہادت افسوس ناک اے۔ پرائیویٹ ملیشیا اتے جتھیں نال دنیا دے ہر ملک کوں خطرہ اے ۔ انہاں جتھیں دے ذریعے ہݨ قاتلانہ حملے کیتے ویندے پئن ، ایندی حمایت دے خوفناک نتیجے نکلسن ، آر ایس ایس دنیا اچ کارروائیاں کریندی پئی اے ۔ کشمیر تے فلسطین دی جنگ دا ٹرننگ پوائنٹ آڳئے ، کینیڈا اچ انڈین ایجنٹاں ہردیپ سنگھ کوں قتل کیتا ، کشمیری رہنماواں کوں ہدف بݨایا ڳیا، جے آر ایس ایس جیہی انتہاپسند تنظیماں کوں عالمی پابندیاں اچ نہ گھن آیا ڳیا تاں ایندے اچ ٻہوں دیر تھی ویسی تے دنیا دے امن کوں خطرہ ہوسی ۔ انہاں آکھیے ایجھیاں تنظیماں تے فیٹف دے پلیٹ فارم توں دہشتگردی اچ ملوث ہووݨ تے پابندی لاوݨی چاہیدی اے۔15:40
