حکومت پنجاب نشتر ہسپتال توں آرتھوپیڈک اتے نیورو سرجری وارڈز کوں ختم کرݨ دے فیصلے تے نظر ثانی کرے،علی حیدر گیلانی

ملتان۔ 04 اگست (اے پی پی) ممبر صوبائی اسمبلی تے پنجاب اسمبلی اچ پیپلز پارٹی دے پارلیمانی لیڈر سید علی حیدر گیلانی آکھیے حکومت پنجاب نشتر ہسپتال توں آرتھوپیڈک اتے نیورو سرجری وارڈز کوں ختم کرݨ دے فیصلے تے نظر ثانی کرے،نشتر ون توں نیورو سرجری اتے آرتھو پیڈک دے شعبیں دی نشتر ٹو منتقلی دا معاملہ پنجاب اسمبلی اچ وی چیساں ۔اے ڳالھ انہاں اتوار کوں ملتان پریس کلب اچ صوبائی اسمبلی دے ممبران  رانا اقبال سراج اتے واصف مظہر راں دے رلے پریس کانفرنس کریندے آکھی اے ۔علی حیدر گیلانی آکھیے نشتر ہسپتال نہ صرف جنوبی پنجاب بلکہ بلوچستان اتے سندھ تئین دے لوکاں صحت دی بنیادی سہولتاں ݙیندا پئے ،نشتر ہسپتال ملتان شہر دے وسط اچ موجود اے جیڑھی لوکاں دی پہچ وچ اے ۔ انہاں آکھیے حکومت پنجاب کانشتر ون دے ݙو وݙے اہم شعبیں نیوروسرجری اتے آرتھو پیڈک کوں نشتر ٹو شفٹ کرݨ دا نوٹیفکیشن سامݨے آئے، ݙوہیں شعبیں دے نشتر ون توں نشتر ٹو منتقل ہووݨ نال شہریاں کوں پریشانیاں دا سامݨا،حکومت پنجاب توں گزارش اے جو نشتر ہسپتال ملتان توں آرتھوپیڈک اتے نیورو سرجری وارڈز کوں وختی نشتر 2 منتقل کرݨ دے فیصلے کوں واپس ڳھدا ونڄے،حکومت پنجاب کوں چاہیدے جو نشترون اتے نشتر ٹو اچ ھک جیہاں طبی سہولتاں ݙیوےتاں جو جنوبی پنجاب سودھے بلوچستان اتے سندھ دے لوک وی ایں توں فیدہ چا سڳن ۔علی حیدر گیلانی آکھیے پیپلز پارٹی دے پلیٹ فارم توں ساݙے خاندان کوں جنوبی پنجاب دے عوام  بارا مینڈیٹ ݙتے ساݙے خاندان ہمیشہ سیاسی وابستگیاں کوں ھک پاسے رکھ تے ملتان شہرسودھے جنوبی پنجاب دی ترقی اتے اتھاں دے عوام دی خوشحالی سانڳے عملی کوششاں کیتن ،اساں جنوبی پنجاب خطے اچ وݙے ترقیاتی منصوبے کروائے،جنوبی پنجاب دی جیڑھی خدمت گیلانی خاندان کیتی او کہیں توں لکی ہوئی کائنی ،اساکوں جݙاں وی موقع ملیے خطے دے عوام دی ترقی سانڳے ساریں توں اڳوں ودھ تے کم کیتے اساں خدمت تے یقین رکھیندوں تے عوام دی خدمت کریندے رہ ویسوں ، یقین ݙوینداں جو جنوبی پنجاب خطے دی مزید ترقی سانڳے وی ہرممکن کوششاں جاری رکھیاں ویسن تاں جو اتھاں دے عوام دی احساس محرومی کوں ختم کیتا ونڄ سڳے ۔علی حیدر گیلانی آکھیے نیوروسرجری اتے آرتھو پیڈک دے شعبیں کوں نشتر ون توں نشتر ٹو منتقل نہ کیتا ونڄے ،حکومت پنجاب کوں چاہیدے جو ݙوہیں ہسپتالاں اچ ہی سارے طبی شعبیں دیاں سہولتاں ݙیوے ۔ نشتر ٹو کوں اوریجنل پلان دے مطابق بݨایا ونڄےے،نشتر ٹو دے سارے شعبیں دا سٹاف مکمل کیتا ونڄے،پی سی ون موجب نشتر ٹو اچ ھک ہزار بیڈز ہووݨے چاہیدن ،نشتر ون آئی سی یو اچ بیڈز دی تعداد ٻہوں گھت اے ،نشتر ون دے آئی سی یو وارڈز دی تعداد ودھائی ونڄے ۔علی حیدر گیلانی آکھیے لاہور دے وݙے ہسپتالاں اچ ساریاں سہولتاں تے شعبے موجود ہن ،حکومت پنجاب توں درخواست اے نشتر ون اتے نشتر ٹو اچ وی اوہے ساریاں طبی سہولتاں ہووݨیاں چاہیدن ، وزیراعلی مریم نواز ملتان دا دورہ کرتے نشتر ون تے نشتر ٹو اچ سہولتاں دا جائزہ گھنن وزیر اعلیٰ پنجاب ملتان آون تاں انہاں کوں مسئلیں دا پتہ لڳسے ، پیپلز پارٹی ہمیشہ جنوبی پنجاب صوبہ دی ڳالھ کیتی اے وختی انڄ صوبے دی منزل پا گھنسوں