لاہور ۔4اگست(اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے سپریم کورٹ دے ݙو معزز جج صاحبان مخصوص نشستاں تے اختلافی نوٹ اچ اہم نکتے چاتن، مخصوص نشستاں دے معاملے تے اوں جماعت کوں ریلیف ݙتا ڳئے جیڑھا درخواست گذار ہی کائناں ہئی۔ پریس کانفرنس توں خطاب کریندے وفاقی وزیر اطلاعات آکھیے سپریم کورٹ دے ݙو معزز جج صاحبان جسٹس امین الدین خان اتے جسٹس نعیم اختر افغان تفصیلی اختلافی نوٹ جاری کیتے جیں اچ آکھیا ڳئے کیس دا تفصیلی فیصلہ 15 ݙینھ گذرݨ دے باوجود نی آسڳیا۔ انہاں آکھیے عموماً فیصلہ سݨاوݨ دے 15 ݙینھ دے اندر تفصیلی فیصلہ جاری تھی ویندے ، آئین دے کجھ آرٹیکلز مخصوص نشستاں متعلق ہن، مخصوص نشستاں تے فیصلے اچ انہاں آرٹیکلز توں ہٹ تے فیصلہ ݙتا ڳئے۔ وفاقی وزیرآکھیے سپریم کورٹ دے ݙو معزز جج صاحبان دے اختلافی نوٹ اچ اے ڳالھ درج اے جو تحریک انصاف ایں کیس وچ فریق کائناں ہئی ، ایکوں ریلیف ݙیوݨ سانڳے آئین دے آرٹیکل 175 اتے 185 اچ تفویض دائرہ اختیار توں ٻاہر ونڄݨا ہوسی تے آرٹیکل 51، 63 اتے 106 کوں معطل کرݨا ہوسی۔ وفاقی وزیر اطلاعات آکھیے تحریک انصاف عدلیہ دے سامݨے درخواست گذار دی حیثیت نال موجود وی کائناں ہئی لیکن انہاں دے81 ممبران کوں ریلیف ݙتا ڳئے تے او لوک جیڑھے مخصوص نشستاں تے منتخب تھی تے آئن حلف چا چکن انہاں دی رکنیت ختم کرݙتی ڳئی۔ انھاں دی رکنیت ختم کرݨ توں پہلے جیڑھے مرحلے طے تھئن ،او قانونی طور تے آپݨی جاہ تے موجود ہن اے حقیقت اے جو سنی اتحاد کونسل دے ممبران جے ایوان اچ سنی اتحاد کونسل توں اٹھی تے تحریک انصاف دیاں صفاں اچ ٻہسن تاں اے آرٹیکل 62(1)F دی خلاف ورزی ہوسی۔ سپریم کورٹ دے ݙو معزز جج صاحبان اپݨے اختلافی نوٹ اچ اے وی آکھیے جو ثابت شدہ حقیقت اے سنی اتحاد کونسل بطور سیاسی جماعت عام انتخابات اچ حصہ نی ڳحدا حتیٰ کہ سنی اتحاد کونسل دے چیئرمین وی آزاد حیثیت اچ انتخاب لڑیے۔ ایں تے آئین اتے قانون واضح ہن، آئین دے تحت انھاں سیاسی جماعتاں جیڑھیاں پارلیمان اچ موجود ہن کوں متناسب نمائندگی دے فارمولے دے تحت مخصوص نشستاں ݙتیاں ویندن ، سنی اتحاد کونسل دا پارلیمان اچ وجود ہی کائناں ہئی انہاں دے چیئرمین وی آزاد حیثیت نال الیکشن لڑیا تے تحریک انصاف دے سابقہ ممبران ایں جماعت اچ شمولیت اختیار کرݨ مناسب سمجھیا جیں دا پارلیمان اچ وجود ہی کائناں ہئی انہاں آکھیے جݙاں ھک سیاسی جماعت دا پارلیمان اچ وجود ہی کائناں ہئی تاں انہاں کوں مخصوص نشستاں کیویں مل سڳدن ۔ وفاقی وزیر آکھیے سنی اتحاد کونسل دے اپݨے آئین اچ لکھیے جو کوئی اقلیتی رکن انھاں دی پارٹی اچ نی رل سڳدا ایویں انہاں کوں اقلیتی نشستاں وی نی مل سڳدیاں ۔ وفاقی وزیر آکھیے سپریم کورٹ دے ݙو معزز جج صاحبان دے اختلافی نوٹ توں سوال دے پیدا تھی ڳئے جو ایں فیصلے تے عمل درآمد سانڳے آئین دے مخصوص نشستاں متعلق آرٹیکلز کوں معطل کرݨا پوسی ۔ وفاقی وزیر آکھیے تحریک انصاف کوں بغیر منگیے ریلیف ݙتا ڳئے ، مخصوص نشستاں تے جیڑھے لوک منتخب تھئن انہاں دی وی حق تلفی تھئی اے انہاں کوں سݨݨا چاہیدا ہئی ۔ مخصوص نشستاں تے ممبران دے انتخاب دے پورے طریقہ کار تے عمل تھئے ، شیڈول دے تحت فہرستاں الیکشن کمیشن ڳن انہاں فہرستاں دی بنیاد تے ارکان شارٹ لسٹ کیتے ڳئن ، سکروٹنی تھئی تے ایندے بعد نوٹیفیکیشن جاری تھیا تے انہاں ارکان اسمبلی اچ حلف چاتا۔ مخصوص نشستاں تے منتخب ارکان دی رکنیت تاں ختم کرݙتی ڳئی مگر انہاں باقی مرحلیں تے غور نی کیتا ڳیا ۔ وفاقی وزیر اطلاعات آکھیے عدلیہ دے فیصلے دے خلاف مسلم لیگ (ن) اتے پیپلز پارٹی نظرثانی دی درخواست ݙتی اے لیکن حالی تئیں اینکوں سماعت سانڳے مقرر نی کیتا ڳیا ۔ وفاقی وزیرآکھیے سپریم کورٹ دے ݙو معزز جج صاحبان اپݨے اختلافی نوٹ اچ آئینی اتے قانونی نکتے چاتن اے لیگل فریم ورک تے وݙا سوالیہ نشان ہن انہاں دا جواب آوݨ ضروری اے
