اسلام آباد ۔ 27 مئی (اے پی پی) وزیر داخلہ چوہدری نثار علی خان جعلی شناختی کارڈ اتے پاسپورٹ رکھنڑ آلے شہریاں کوں جعلی شناختی کارڈ اتے پاسپورٹ 2مہینیاں دے اندر از خود جمع کراونڑ دی مہلت ڈیندیں ہوئیں آکھیاجو مہلت توں فائدہ چاونڑ آلیاں دے خلاف کوئی کاروائی کائنا کیتی ویسی،جعلی کارڈ اتے پاسپورٹ سرینڈر نہ کرنڑ آلیاں دے خلاف قانون دے تحت سخت کاروائی کیتی ویسی، آندے چھی مہینیاں اچ سارے شناختی کارڑ دی ولا تصدیق تھیسی، جعلسازی اچ ملوث نادرا اتے پاسپورٹ اہلکار از خود جعلسازیاں دی نشاندہی کریسن اتے انہاں کوں وی رعایت ڈتی ویسی،نتاں نوکریاں توں فارغ کرنڑ دے علاوہ انہاں دے خلاف فوجداری مقدمے در ج کیتے ویسن، پاکستانی جعلی شناختی کارڈ دستاویزات دے حامل غیر ملکیاں دی نشاندہی سانگے ریوارڈ سکیم دا اعلان کیتا ویسی،شناختی کارڈ دی تصدیق سانگے نادرا اچ رجسٹرڑ اڈھائی کروڑ ٹبراں دے سربراہواں کوں انہاں دے فیملی ٹری بھجوائے ویسن۔جمعہ کوں نادرا ہیڈ کوارٹرز اچ اعلیٰ سطح دے بعد نیوز کانفرنس نال خطاب کریندیں ہوئیں آکھیا جو ڈائریکٹوریٹ جنرل آف پاسپورٹس اینڈ امیگریشن کوں 48گھنٹیاں دی موکل ڈتی اے جو جعلی شناختی کارڈ دستاویزات دے خاتمے بارے روڈ میپ بنڑا سگن ۔اج دا اجلاس ایں سلسلہ دی ہک کڑی ہا۔انہاں آکھیا جو کہیں وی باعزت،باوقار،جمہوری اتے با غیرت ملک سانگے اے گالھ برداشت دے قابل کائنی جو اوندی شہریت ویچی ونجے ۔انہاں آکھیا جو جیڑھے ایں گھنائونے کاروبار اچ ملوث ہن انہاں کوں برداشت کائنا کیتا ویسی۔انہاں آکھیا جو بلوچستان اچ امریکی حملے دے واقعہ دے بعد پہلے توں اساں شناختی دستاویزات اچ جعلسازی دے خلاف اقدامات کریندے پیسے۔انہاں ایں بارے اعدادوشمار ڈسیندیں ہوئیں آکھیا جو 2006ء اچ صرف 25پاسپورٹس بلیک لسٹ کیتے گئن ۔2007اچ37، 2008ء اچ 12، 2009ء اچ 25 اتے اگلے ترائے سالیں اچ 361شناختی کارڈ بلاک کیتے گئن جڈانجو میڈی وزارت سنبھالنڑ دے بعد 29ہزار پاسپورٹس بلیک لسٹ کیتے گئن جیڑھے جو جعلسازی کر تے گھدے گئے ہن ۔انہاں آکھیا جو ہنگامی بنیاداں تے ایں بارے اقدامات کیتے گئن اتے فیصلہ کیتا گئے جو آندے چھی مہینیاں اچ سارے شناختی کارڈ اں دی ولا تصدیق تھیسی۔انہاں آکھیا جو اے پاکستان دی سکیورٹی دا مسئلہ اے جئیں تے کوئی سمجھوتہ کائنا کیتا ویسی۔انہاں آکھیا جو ایں توں پہلے موبائل فون سماں دی تصدیق دے مسئلے تے وی آکھیا گئیا ہئی جو اے بہوں اوکھا کم اے اتے شاید کائنا تھی سگدی جڈانجو میں واضح کیتا ہئی جو اے کم تھی تے رہسی ۔موبائل فون کمپنیاں دے مالکاں ملک توں سرمایہ باہر گھن ونجنڑ دی دھمکی وی ڈتی ہئی ،جڈانجو اساں کہیں دا دبائو کائنی گھدا اتے واضح کیتا جو پاکستان دی سلامتی ساریاں توں مقدم اے اتے موبائل فون کمپنیاں دے چیف ایگزیکٹو کوں وی ڈسیا گئیا جو کوئی سم دہشت گردی اچ استعمال تھی تاں کمپنی دے چیف دے خلاف مقدمہ درج تھیسی جئیں دے بعد ساڈھے ڈاہ کروڑ سماں دی تصدیق دا عمل پورا کیتا گئیا ۔انہاں آکھیا جو نادرا اشتہارات دے ذریعے جعلی شناختی کارڈ بنڑاونڑ آلیاں سانگے 2مہینیاں دی مہلت دا اعلان کریسی ،ایں عرصہ اچ او از خود جعلی شناختی کارڈ نادرا کوں جمع کراو ڈیوے،ایندے علاوہ نادرا اتے پاسپورٹ ڈائریکٹوریٹ دے جنہاں اہلکاراں جعلی دستاویزات بارے تعاون کیتی اے اتے انہاں کوں پکڑنڑ اچ وو مدد کرے تاں ایجھے شہریاں دے خلاف کوئی کاروائی کائنا کیتی ویسی۔
