اسلام آباد۔6اگست (اے پی پی) وفاقی وزیرخزانہ تے محصولات سینیٹر محمد اورنگزیب آکھیا جو موسمیاتی تبدیلیاں نال نٻڑݨ کیتے موثر منصوبے ٻݨاوݨ دی لوڑھ اے، موسمیاتی فنانسگ اچ نجی شعبے کوں اہم کردار ادا کرݨا پوسی۔ اے ڳالھیں انہاں منگل کوں اکیومن پاکستان ولوں کلائمیٹ ایکشن فار پاکستان دے موضوع تے تھیوݨ آلی تقریب توں خطاب کریندیں ہوئیں آکھی۔ انہاں آکھیا جو موسمیاتی تبدیلی توں متاثر تھیوݨ آلے ملکاں اچ پاکستان ساریاں توں اُتے اے۔ 2022 اچ موسمیاتی تبدیلیاں پاروں پاکستان اچ چھل پاروں وݙی تباہی تھئی۔ ایں چھل پاروں پاکستان کوں 30 ارب ڈالر توں ودھ دا ضیان تھیا۔ وزیرخزانہ آکھیا جو جنیواکانفرنس اچ مختلف ملکاں ݙوپاسہ اتے کثیر الجہتی شراکتداراں اتے بین الاقوامی اداریاں پاکستان کیتے تقریباً نو ارب ڈالر توں ودھ تعاون دا اعلان کیتا ہئی جڈانجو پاکستان کوں اعلان تھیے تعاون دے مطابق فنڈز نی ملیے۔ انہاں آکھیا جو موسمیاتی فنانسنگ کیتے منصوبے ٻݨاوݨ دی لوڑھ اے۔ وزیرخزانہ آکھیا جو آبادی اچ ودھارے دے نال نال وسائل ودھاوݨ وی ضروری اے۔ پاکستان کوں آبادی کنٹرول کرݨ کیتے اقدامات کرݨے پوسن۔
