اسلام آباد۔7اگست(اے پی پی) وزیراعظم محمد شہباز شریف آکھیے ساوݨ سیزن اچ پورے ملک اچ ݙاہ کروڑ توں ودھ ٻوٹے رادھے ویسن ، وݨ توں آب و ہوا صاف، موسمیاتی تبدیلیاں دے اثرات اچ کمی اتے قدرتی حسن اچ ودھارا تھیسی ، قدرت پاکستان کوں ٻہوں نعمتاں نال نوازیے، اساکوں ݙینھ رات محنت نال قدرت دی ݙتیاں ڳیاں نعمتاں توں فیدہ چاوݨا اے ۔ وزیراعظم اتھاں وزیراعظم ہاؤس دے سبزہ زار اچ ٻوٹا لاتے شجر کاری مہم شروع کرݙتی ۔ ایں موقع تے وزیراعظم کوں شجرکاری مہم تے بریفنگ ݙتی ڳئی۔ وزیراعظم کوں ݙسایا ڳئے جون 2024 اچ ݙو ارب 20 کروڑ ٻوٹے رادھے ڳئن ۔ ایں موقع تے ڳالھ کریندے وزیراعظم شہباز شریف آکھیے اڄ اساں ساوݨ دی شجر کاری شروع کریندے پیوں ، ایں شجر کاری اچ پورے ملک اچ ݙاہ کروڑ ٻوٹے رادھے ویسن، ایں توں نہ صرف پاکستان سوہݨا لڳسی بلکہ موسمیاتی تبدیلی جیں پاکستان کوں 2022 اچ خراب نشانہ بݨایا ہئی ایں کوں وی کنٹرول کرݨ اچ مدد ملسی ، فضائی آلودگی اچ کمی واقع تھیسی تے قدرتی حسن اچ ودھارا تھیسی ۔ وزیراعظم آکھیے ساوݨ دا اے موسم دل خوش کرݨ آلا موسم اے جیں اچ ہر پاسے مسکراہٹاں کھنڈردئن ، مینھ پاروں گرمی دی شدت گھٹ ڳئی اے ۔ وزیراعظم آکھیے اللہ تعالیٰ پاکستان کوں ٻہوں نعمتاں نال نوازیے اے ساݙے اتے ہے جو اساں ݙینھ رات محںت کرتے انہاں نعمتاں توں فیدہ چااؤں تے اللہ تعالیٰ دے حضور سجدہ شکر ادا کروں، اساں اللہ تعالیٰ دا جتنا شکر ادا کروں گھٹ ہوسی۔ وزیراعظم آکھیے ساوݨ دے موسم اچ شجرکاری مہم دے آغاز دے موقع تے متعلقہ حکام کوں مبارخ ݙینداں امید کرینداں صوبائی حکومتاں نال رل تے پورے پاکستان اچ وفاقی حکومت اتے ذمہ واراں رل تے ایں عظیم کم اچ اپݨا چنڳاں کردار ادا کریسن تے پاکستان کوں آلودگی توں بچاوݨ سانڳے ایں ملک کوں سوہݨا بݨاوݨ سانڳے آپݨا چنڳاں کردار نبھیسن ۔ وزیراعظم آکھیے اتھاں ساݙے ٻال وی ہن جیڑھے پاکستان دے تابناک مستقبل دی ضمانت ہن،وے وݙے تھی تے تعلیم گھن تے پاکستان دے عظیم معمار بݨسن ٻالاں کوں تعلیم دے نال ہنر مند بݨیسوں توں جو او ملک دی چنڳی خدمت کرسڳن
