ڈھاکہ۔7اگست(اے پی پی) بھارت اچ موجود بنگلہ دیش دی سابق وزیر اعظم شیخ حسینہ واجد متحدہ عرب امارات، سعودی عرب اتے فن لینڈ اچ پناہ گھنݨ تے غور کریندیاں پئن ۔ ڈھاکا ٹریبیون دی رپورٹ موجب انہاں دے بھارت پڄݨ دے 48 گھنٹے بعد وی انھاں دی آخری منزل غیر یقینی اے۔ برطانیہ تے امریکا دے دروازے فی الحال بند تھیوݨ پاروں ہݨ او ݙوجھے آپشن ݙیکھدیاں پئن ۔اخبار دی ہندو دے حوالے نال ݙسایا ڳئے بنگلہ دیش دی سابق وزیر اعظم پہلے ہی برطانیہ اچ سیاسی پناہ گھنݨ دی کوشش اچ ناکام تھی چکئن ۔ نتیجتاً ہݨ او متحدہ عرب امارات،سعودی عرب اتے فن لینڈ اچ پناہ گھنݨ تے غور کریندیاں پئن تاں جو انہاں دے پترسجیب واجد جوئے ایندی تردید کیتی اے۔ سجیب واجد جوئے مزید ݙسایا جو او خود ایں ویلھے واشنگٹن اچ ہن ۔ انہاں دی ماسی لندن تے انہاں دی بھیݨ دہلی اچ رہندی اے تے ممکن اے جو انہاں دی اماں انہاں اچوں کہیں کنے ونڄݨ چاہندی ہووے ۔ انہاں آکھیے انہاں دے خاندان دے زیادہ لوک امریکا، فن لینڈ تے بھارت اچ رہندن ۔ایندے توں پہلے ذرائع ابلاغ ݙسایا ہئی جو برطانیہ انہاں کوں سیاسی پناہ ݙیوݨ توں انکار کرݙتے تے امریکہ انہاں دا ویزہ منسوخ کرݙتے ۔ ڈھاکہ ٹریبیون موجب شیخ حسینہ مزید کجھ ݙینھ بھارت اچ رہسن حالی اے پتہ کائنی جو بھارتی حکومت انھاں کوں کݙاں تئیں بھارت اچ رہݨ دی اجازت ݙیسی۔
