اسلام آباد۔7اگست (اے پی پی) وفاقی وزیر خزانہ و محصولات سینیٹر محمد اورنگزیب آکھیے پاکستان چنڳی معاشی کارکردگی ݙیکھدا پئے ، ٹیکس محصولات اتے زرمبادلہ دے ذخیرے ودھدے پئن ، بین الاقوامی ریٹنگ ایجنسیاں دی طرفوں پاکستان دی کریڈٹ ریٹنگ اچ چنڳائی پاروں ملک دا مجموعی اقتصادی استحکام نظر آندا پئے۔ اے ڳالھ انھاں پاکستان اچ فن لینڈ دے سفیر ہانو ری پاتھی کوں ملاقات اچ آکھی اے ۔ وزیر خزانہ فن لینڈ دے سفیر کوں ملک دی مجموعی معاشی صورتحال اتے معاشی استحکام سانڳے چاتے ونڄݨ آلے اقدامات تے بریفنگ ݙتی۔ انہاں آکھیے پاکستان بین الاقوامی مالیاتی فنڈ نال 9 مہینے دا پروگرام مکمل کرچکے جݙاں جو ہݨے ہی 37 مہینے تے مشتمل پروگرام سانڳے آئی ایم ایف نال سٹاف لیول معاہدہ وی تھی چکیے ۔ انہاں فن لینڈ دے سفیر کوں ایف بی آر دی ڈیجیٹلائزیشن، توانائی دے شعبہ اچ اصلاحات، سرکاری ملکیتی اداریں دی نویں سروں تنظیم تے برآمدات تے مبنی نمو سانڳے حکومتی اقدامات دا وی ݙسائے ۔ وزیر خزانہ آکھیے انہاں اقدامات دا بنیادی مقصد برآمدات تے مبنی پائیدار نمو گھنݨ اے ۔ فن لینڈ دے سفیر پاکستان اچ اقتصادی اصلاحات دی تعریف کیتی ۔ انہاں آکھیے پاکستان اچ فن لینڈ دی کمپنیاں دی مالی حالت چنڳی تھئی اے ۔ وزیر خزانہ جی ایس پی پلس دی تجدید اچ معاونت تے فن لینڈ دا شکریہ ادا کیتا تے آکھیے ایں سہولت پاروں ملک دے برآمدی شعبہ کوں فیدہ تھیندا پئے۔ ملاقات اچ فریقین پاکستان اتے فن لینڈ وچال ݙوطرفہ تعلقات ودھاوݨ تے اتفاق کیتا تے اقتصادی استحکام اتے نمو سانڳے رلے کم کرݨ دا عزم کیتے۔
