انفارمیشن ٹیکنالوجی اچ اصلاحات، ڈیجیٹائزیشن دے لائحہ عمل تے عملدرآمد تھیندا پئے، وزیراعظم نال جی ایس ایم اے دے چار رکنی وفد دی ملاقات

اسلام آباد۔7اگست(اے پی پی)وزیراعظم محمد شہباز شریف آکھیے جو انفارمیشن ٹیکنالوجی اچ اصلاحات اتے ڈیجیٹائزیشن دے لائحہ عمل تے عملدرآمد تھیندا پئے۔ اے ڳالھ انہاں اسلام آباد اچ جی ایس ایم ایسوسی ایشن ایشیاء پیسفک دے سربراہ جولئین گورمین دی اڳواݨی اچ جی ایس ایم اے دے چار رکنی وفد نال ملݨ ویلھے آکھی۔ وزیراعظم آکھیا جو پاکستان اچ ٹیلی کمیونیکیشن اتے انفارمیشن ٹیکنالوجی دےو دھارے سانڳے اسلام آباد اچ ڈیجیٹل نیشنل سمٹ تھیوݨ چنڳی ڳالھ اے، ڈیجیٹلائزیشن سانڳے اقدامات اچ جی ایس ایم اے دا اہم کردار اے، عام لوکاں دی انٹرنیٹ تئیں ودھ پڄ، ڈیجیٹل انفراسٹرکچر دی بہتری، ای۔گورننس، نوجواناں اچ ڈیجیٹل سکلز دی پیشہ وارانہ تربیت اتے جدت اتے ایں شعبے اچ کاروبار دے ودھارے تے توجہ ݙتی ڳئی اے، آئی ٹی اتے ٹیلی کام دے شعباں دی ترقی کیتے وفاقی حکومت ایں مالی سال تاریخی ترقیاتی بجٹ رکھیے، ملکی آئی ٹی برآمدات ودھاوݨ کیتے ترجیحی بنیاداں تے کم کریندے پئے ہیں، ساݙا مقصد ہر ڄݨے کولو سمارٹ فون، ہر گھر اچ براڈ بینڈ انٹرنیٹ اتے ہر کاروبار اچ کیو آر کوڈ دی سہولت ہووے۔ وفد وزیراعظم کوں پاکستان سودھا ڄڳ اچ ٹیلی کام سروسز دے ودھارے کیتے جی ایس ایم اے دے کردار دا ݙسایا۔ ملاقات اچ وزیر مملکت برائے انفارمیشن ٹیکنالوجی و ٹیلی کام شزا فاطمہ، چئیر مین پاکستان ٹیلی کمیونیکیشنز اتھارٹی میجر جنرل (ر) حفیظ الرحمن اتے ٻئے متعلقہ اعلیٰ سرکاری افسران وی موجود ہن۔