اسلام آباد۔8اگست(اے پی پی) وزیراعظم دے کوآرڈینیٹرصحت ڈاکٹر مختار احمد بھرتھ آکھیے وزیراعظم دے ہیپاٹائٹس سی مکاوݨ دا پروگرام 68 ارب دی رقم نال شروع کیتے ، ہیپاٹائٹس سی مکاوݨ دی جنگ اچ عوام دی مدد دے بغیر نی جتی ونڄ سڳدی ،پاکستان اچ ہیپاٹائٹس سی دا موثرعلاج موجود اے جیں دی کامیابی دی شرح 95 فیصد توں ودھ اے ۔ اے ڳالھ انہاں ہیپاٹائٹس متعلق آگاہی ݙیوݨ دی تقریب توں خطاب اچ آکھی اے ۔ ڈاکٹرمختار احمدبھرتھ آکھیے حکومت ہیپاٹائٹس سی مکاوݨ سانڳے مربوط اقدامات یقینی بݨیندی پئی اے ۔ ملک اچ ہیپاٹائیٹس سی دے کیساں دی تعداد ٻہوں زیادہ اے ۔وزیراعظم دے ہیپاٹائٹس سی مکاوݨ دا پروگرام 68 ارب دی خطیر رقم نال شروع کیتے انہاں آکھیے ایں پروگرام نال 12 سال توں ودھ عمر دی آبادی دی وݙے پیمانے تے سکریننگ کیتی ویسی ۔مثبت آوݨ آلے مریضاں دا ٹیسٹ تے مفت علاج کیتا ویسی۔ ڈاکٹر مختار احمد بھرتھ آکھیے حکومت شراکت داراں دے تعاون نال 2030 تئیں وائرل ہیپاٹائٹس مکاوݨ سانڳے پوری طرح پرعزم اے۔ہیپاٹائٹس سی مکاوݨ دی جنگ عوام دی مدد دے بغیر نی جتی ونڄ سڳدی ۔ انہاں آکھیے خون نال کھنڈݨ آلا انفیکشن ہیپاٹائٹس سی متاثرہ خون دی منتقلی توں کھنڈدے۔ ہیپاٹائٹس سی توں بچݨ دا بہترین طریقہ وائرس دی منتقلی آلے عوامل توں احتیاط ورتن ۔خون دے ہیپا ٹائٹس وائرس توں پاک ہووݨ یقینی بݨاوݨ سانڳے ہمیشہ سکرین تھیا خون لواون۔ کݙاہیں وی ایہو سویاں چیزاں استعمال نہ کرن جیں تے ݙوجھے لوکاں دا خون لڳ سڳدا ہووے ۔ ہیپاٹائٹس سی دی کوئی ویکسین دستیاب کائنی ۔ہیپاٹائٹس سی ھک خاموش بیماری اے کیوں جو ایندی علامت کائنی ۔ بیماری دی کیفیت جاݨݨ دا ھکو طریقہ ٹیسٹ اے۔ پاکستان اچ ہیپاٹائٹس سی دا موثرعلاج موجود اے جیں دی کامیابی دی شرح 95 فیصد توں ودھ اے ۔ ہر ھک کوں ہیپاٹائٹس سی سانڳے اسکریننگ اتے ٹیسٹ کراوݨا چاہیدے
