اسلام آباد۔9اگست (اے پی پی) وفاقی وزیر خزانہ تے محصولات سینیٹر محمد اورنگزیب نال عوامی جمہوریہ چین دے سفارت خانے دے ناظم الامور شی یوآن کیانگ اتے ٻئے حکام ملاقات کیتی۔ وزیر اعظم دے معاون خصوصی برائے پاور محمد علی اتے وزیر مملکت برائے خزانہ و محصولات علی پرویز ملک اتے وزیربجلی سرداراویس احمد خان لغاری وی ایں موقع تے موجود ہن۔ وزیرخزانہ چینی وفد دا خیر مقدم کیتا اتے ݙوہیں ملکاں وچال مضبوط ݙوپاسہ تعلقات تے زور ݙتا۔ انہاں پاکستان دے معاشی منظر نامے تے اڄوکی پیش رفت تے روشنی پاتی اتے آکھیا جو حکومت اقدامات پاروں زرمبادلہ دے ذخائر اچ ودھارا، مہانگ اچ ڳھٹکی اتے ٹیکساں دی وصولی وی ودھی اے۔ وزیرخزانہ توانائی دے شعبے اچ اہم اصلاحات، سرکاری ملکیتی اداریاں دی تنظیم نووبحالی اتے نجکاری دی جاری کوششوں بارے وی چینی ناظم الامورکوں ݙسیا۔ چینی سفارت خانہ دے ناظم الامور پاکستان دی پائیدار اقتصادی ترقی دی حمایت کیتے چینی حکومت دے عزم دا اعادہ کیتا۔
