اسلام آباد۔16اگست(اے پی پی)سرائیکستان قومی کونسل صوبہ سرائیکستان کیتے فوری صوبہ کمیشن ٻݨاوݨ دا مطالبہ کریندے آکھیے جو ساݙا نعرہ صوبہ سرائیکستان یا موت اے، حق کیتے سر تے کفن ٻدھ تے نکلسوں، حکومت صوبہ کمیشن ٻݨاوے نتاں اسلام آباد تئیں پیدل لانگ مارچ تھیسی۔ اے ڳالھ سرائیکستان قومی کونسل دے چیئرمین ظہور دھریجہ، دھریجہ نگر اچ معروف ماہر تعلیم ایوب دھریجہ دی یاد اچ تھیوݨ آلی یارہویں سرائیکی تعلیمی کانفرنس اچ خطاب کریندے آکھی۔ تقریب دی نظامت پروفیسر نذیر بزمی نٻھائی۔ کانفرنس نال پروفیسر ڈاکٹر فاروق احمد دھریجہ، پروفیسر ڈاکٹر منیر ملک، میاں رحیم دین پوری، مرزا حبیب مغل، اظہر عروج، سرائیکی رہنما ارشد رحمانی، اقلیتی رہنما دینا رام، حبیب اللہ خیال، ولید ملک، مقصود دھریجہ، حاجی عید احمد دھریجہ، آصف دھریجہ اتے ٻعے شرکا خطاب کیتے۔ کانفرنس اچ شرکا کولو صوبہ سرائیکستان کیتے ہر قربانی اتے پیدل مارچ اچ ودھ شرکت دی پت ڳھدی ڳئی۔
ظہور دھریجہ آکھیا جو سرائیکی صوبے دا بل سینٹ توں پاس تھی چکیے، (ن) لیگ اتے پیپلز پارٹی دی اتحادی حکومت ایکوں قومی اسمبلی توں منظور کراون، ڄیکر صوبہ کمیشن 15 اکتوبر تئیں ولا فعال نا کیتا ڳیا تاں دھریجہ نگر توں اسلام آباد تئیں پیدل مارچ دے لائحہ عمل دا اعلان کیتا ویسی اتے ایوان صدر اسلام آباد دے سامݨے دھرنا ݙیسوں۔ انہاں آکھیا جو سرائیکی قوم دیاں پاکستان کیتے وݙیاں خدمتاں ہین، پاکستان ٻݨݨ دے بعد سرائیکی قوم کوں آزادی نصیب نئیں تھئی، رنجیت سنگھ اتے انگریز سامراج دا ظلم اڄ وی جاری اے۔ پروفیسر ڈاکٹر فاروق احمد دھریجہ آکھیا ڄیکر اڄ یورپ راج کریندا پئے تاں ایندی وجہ تعلیم اے، میݙی ہالینڈ توں پی ایچ ڈی کراوݨ اچ ظہور دھریجہ اتے ایوب دھریجہ دا کمال اے ڄیڑھے ہمیشہ تعلیم کوں اڳونہا رکھݨ دا آہدے ہن، عجب کہانی اے جو ڄڳ 5 جی دو ویندا پئے اتے ساݙے کولو 4 جی دا وی کباڑہ کرݙتا ڳئے، روزانہ سیکڑاں ڈالر دا نقصان تھیندا پئے، ساݙی سکھ انڄھ دا تے لڳی ہوئی اے، پاکستان کوں اڳو تے ڳھن ونڄݨ کیتے جدید ٹیکنالوجی اپناوݨی ہوسی۔ پروفیسر نذیر احمد بزمی آکھیے اڄ دھریجہ نگر اچ ݙو درجن توں ودھ ایم اے سرائیکی، ایم فل سرائیکی اتے پی ایچ ڈی سکالر ہین تاں ایندی وجہ ایوب دھریجہ دی سوچ اتے محنت اے۔ سرائیکی اڳواݨ ارشد رحمانی آکھیا جو سرائیکی تعلیم اچ رکاوٹاں پاتیاں ویندا پن، پنجاب ٹیکسٹ بک بورڈ سرائیکی کتابیں نئیں چھپیندا پیا، سکولاں اچ سرائیکی تعلیم کیتے اساتذہ نئیں ݙتے ویندے، ملتان، بہاولپور اتے ڈی جی خان بورڈ منظوری دے باوجود ناویں ݙاہویں اچ سرائیکی داخلیاں کیتے اشتہار نئیں ݙیندا پیا، سرائیکی کوں قومی زبان دا درجہ ملݨا چاہیدے اتے وسیب دے ٻالاں کوں تعلیم ما ٻولی اچ ݙیوݨی چاہیدی اے، ایہو ایوب دھریجہ دا مشن ھا۔ پروفیسر ڈاکٹر منیر ملک آکھیا جو ایوب دھریجہ بزم ادراک دے بانی اتےعظیم دانشور ہن، اڄ اساں جتھاں ہیں انہاں دی سوچ پاروں ہی ہیں، تھے، انہان دے منہ موڑ ونڄݨ دا خلاء ولا پر نئیں تھی سڳدا۔ مرزا حبیب مغل آکھیا جو ایوب دھریجہ ساݙا عظیم دوست اتے دور اندیش دانشور ھا او کٹھ ملائیت اتے جعلی پیر پرستی دے خلاف ھا ٻھل اپݨے ٻھرا ظہور دھریجہ دا پیراں توں ودھ احترام کریندا ھا۔ دینا رام آکھیا جو ایوب دھریجہ کوں جدید آئیڈیاز دا بانی نا اکھیڄے تاں چنڳی ڳالھ نئیں۔ کانفرنس اچ سرائیکی شعراء عبدالقادر بے وس، رشید دھریجہ، ہوشو شیدی، عدنان دھریجہ، محمد احمد چشتی اتے ٻنھاں اپݨا کلام وی پیش کیتے۔
