اسلام آباد۔19اگست(اے پی پی)وفاقی وزیر خزانہ و محصولات سینیٹر محمد اورنگزیب حکومت ولوں مستحکم اتے سازگار کاروباری ماحول ݙیوݨ دا عزم کریندے آکھیے جو ملک اچ سرمایہ کاری سوکھی کرݨ کیتے سارے اقدامات کریندی پئی اے۔ اے ڳالھ انہاں اسلام آباد اچ مشرق بینک دے صدر/جی سی ای او احمد عبدل آل نال ملݨ ویلھے آکھی۔ انہاں پاکستان دے اقتصادی منظرنامہ اتے سرمایہ کاری دے مواقع تے الایا۔ ملاقات اچ وزیر مملکت علی پرویز ملک، فنانس ڈویژن اتے سٹیٹ بینک آف پاکستان دے سینئر افسران وی موجود ہن۔ وزیر خزانہ ملک دے معاشی منظرنامے دا جائزہ پیش کریندے کلی معیشت دے استحکام دے اشاریاں اچ بہتری، مستحکم کرنسی اتے مالیاتی منڈیاں اچ تیزی دا ݙسایا۔ انہاں بورڈ آف ریونیو، سرکاری ملکیتی اداراں اچ اصلاحات، ٹیکس دی بنیاد اچ وسعت، کاروبار اچ آسانی، ڈیجیٹلائزیشن نال معیشت تکڑی کرݨ اتے سرمایہ کاراں دا اعتمادودھاوم کیتے اقدامات دا وی ݙسایا۔ مشرق بنک دے صدر حکومتی اقدامات اتے اصلاحات دی تعریف کریندے مشرق بینک ولوں پاکستان دے مالیاتی شعبے اچ تعاون اتے اقتصادی ترقی اچ حصہ پاوݨ دی دلچسپی ݙکھائی۔ انہاں انفراسٹرکچر، توانائی، ٹیکنالوجی، زراعت و ایس ایم ایز سودھا پاکستان اتے متحدہ عرب امارات وچال ترسیلات زر، تجارت، مالیات اتے اسلامی بینکاری کیتے تعاون ودھاوݨ تے ڳالھ مہاڑ کیتی۔
