لاہور۔28اگست(اے پی پی) جنوبی افریقہ دی ویمنز کرکٹ ٹیم آندے مہینے پاکستان آسی جتھاں او 3 ٹی 20 میچاں دی سیریز کھیݙسی۔ پاکستان کرکٹ بورڈ (پی سی بی) آکھیے جو جنوبی افریقا دی ٹیم 13 ستمبر کوں ملتان پڄسی جتھاں سیریز دے سارے میچ کھیݙیے ویسن۔ اے میچز 16، 18 اتے 20 ستمبر کوں تھیسن۔ سیریز توں بعد جنوبی افریقن ٹیم 21 ستمبر کوں متحدہ عرب امارات ویسی ڄݙاں جو پاکستان ٹیم 23 ستمبر کوں یو اے ای ویسی جتھاں آئی سی سی ویمنز ٹی20 ورلڈکپ 2024 تھیوݨے۔ پاکستان آئی سی سی ویمنز ٹی20 ورلڈکپ 2024 دے گروپ اے اچ آسٹریلیا، بھارت نیوزی لینڈ اتے سری لنکا ڄݙاں جو جنوبی افریقا، گروپ بی اچ بنگلادیش، انگلینڈ، اسکاٹ لینڈ اتے ویسٹ انڈیز نال اے۔ سکاٹ لینڈ اتے بنگلادیش دے خلاف بالترتیب 28 اتے 30 ستمبر کوں وارم اپ میچاں دے بعد پاکستان دا مقابلہ 3 اکتوبر کوں شارجہ اچ سری لنکا نال تھیسی۔ 6 اکتوبر کوں بھارت دے خلاف میچ دبئی اچ تھیسی۔ آئی سی سی ویمنز ٹی20 ورلڈکپ 2024 کیتے قومی کرکٹ ٹیم دا اسکواڈ جنوبی افریقا دے خلاف 3 میچاں دی سیریز کھیݙسی۔
