اسلام آباد۔29اگست(اے پی پی)وفاقی وزیر خزانہ و محصولات سینیٹر محمد اورنگزیب پائیدار اتے موثر توانائی سانڳے پاکستانی اتے چینی کمپنیاں وچال مشترکہ کوششاں تے زور ݙیندے آکھیے جو بین الاقوامی معاہدیاں تے عملدرآمد کیتا ویسی۔ او پورٹ قاسم الیکٹرک پاور کمپنی (پی کیوای پی سی) دے وفد نال ملݨ ویلھے الیندے پئے ہن۔ وفد دی اڳواݨی پاور چائنا ریسورسز دے صدر ریانگ تیانیو کیتی۔ ملاقات اچ وزیر توانائی اویس احمد خان لغاری، وزیر مملکت برائے خزانہ علی پرویز ملک، سیکرٹری پاور اتے فنانس ڈویژن دے اعلیٰ حکام وی موجود ہن۔ اجلاس اچ بجلی دے شعبہ دے مختلف امور ڄیویں توانائی پیدا کرݨ آلیاں کوں ادائیگیاں کرݨ اچ اوکھ حل کرݨ سودھا درآمدی ایندھن تے انحصار ڳھٹاوݨ دے منصوبیاں کوں مقامی کوئلہ تے چلاوݨ کیتے تکنیکی و مالیاتی فزیبلٹی معاملات دا وی جائزہ ڳھدا ڳئے۔ وزیر خزانہ مختلف شعبیاں خاص کر توانائی دے شعبے اچ ڈھانچہ جاتی اصلاحات، سرکاری ملکیتی اداریاں دی بحالی اتے پاور سپلائی کمپنیاں دی نجکاری دے اقدامات دا ݙسایا۔ پورٹ قاسم الیکٹرک پاور کمپنی دے صدر توانائی دے شعبے اچ اصلاحات، پورٹ قاسم کول پروجیکٹس دے آپریشنز بحال رکھݨ کیتے حکومتی تعاون تے شکریہ ادا کیتے۔ اجلاس اچ پی کیو ای پی سی، پاور ڈویژن اتے فنانس ڈویژن دے اراکین دا ورکنگ گروپ ٻݨآوݨ دا وی معاہدہ تھئے ڄیڑھا روزانہ دی بنیاد تے پیش رفت دی نگرانی کریسی جو متفقہ اقدامات موثر انداز نال ویلھے تے یقینی ٻݨائے ونڄن۔
