اسلام آباد۔30اگست(اے پی پی)وزارت خزانہ آکھیے جو اہم معاشی اشاریاں اچ بہتری دا رحجان، اگست اچ افراط زر دی شرح 9.5 توں ڳھن تے 10.5 فیصد اتے ستمبر اچ 9 توں ڳھن تے 10 فیصد تئیں رہݨ دا امکان اے۔ وزارت خزانہ دے ماہانہ اقتصادی اپ ڈیٹ دے مطابق بیرونی طلب اچ اضافہ، مستحکم ایکسچینج ریٹ، افراط زر اچ کمی اتے زری پالیسی اچ نرمی پاروں جاری مالی سال اچ وݙیاں صنعتاں دی پیداوار ودھسی۔ خریف 2024 دی فصلاں اتے پیداوار دا انحصار موسمیاتی عوامل تے منحصر اے، حالیہ اتے جاری بارشاں پاروں چاول، چینی، سبزیاں اتے ٻیاں فصلاں تے مثبت اتے منفی ݙوہیں اثرات پئے سڳدن۔ وزارت خزانہ آکھیے جو ترسیلات زر، برآمدات اتے درآمدات ودھاوݨ دا رحجان وی برقرار رہݨ دا امکان اے۔ اگست اچ برآمدات 2.5 ارب ڈالر توں ڳھن تے 3.2 ارب ڈالر، درآمدات 4.5 ارب ڈالر توں ڳھن تے 5 ارب ڈالر اتے ترسیلات زر 2.6 ارب ڈالر توں ڳھن تے 3.3 ارب ڈالر وچال رہݨ دا امکان اے۔ برآمدات اتے ترسیلات زر ودھݨ نال بیرونی کھاتیاں دی صورتحال اچ بہتری آئی اے۔ جولائی 2024 اچ حسابات جاریہ دے کھاتیاں دا خسارہ 0.2 ارب ڈالر تئیں محدود تھی ڳئے، پچھلے سال جولائی اچ حسابات جاریہ دے کھاتیاں دا خسارہ 700 ملین ڈالر ھا۔ جولائی 2024 اچ ملکی برآمدات دا حجم 2.4 ارب ڈالر ریکارڈ تھیا ڄیڑھا پچلھے سال جولائی دے مقابلہ اچ 12.9 فیصد ودھ اے، درآمدات تے 4.8 ارب ڈالر دا زرمبادلہ خرچ تھیا ڄیڑھا پچھلے سال جولائی دے 4.1 ارب ڈالر دے مقابلہ اچ 16.3 فیصد ودھ اے، چاول، پھلاں، ریڈی میڈگارمنٹس اتے پلاسٹک دی مصنوعات اچ ودھارا ݙسیے، اہم درآمدی اشیاء اچ خام تیل، ایل این جی اتے پام آئل سرفہرست اے۔وزارت خزانہ دے مطابق جولائی اچ سمندر پار پاکستانیاں دی ترسیلات زر دا حجم 3 ارب ڈالر رہے ڄیرھا سال جولائی توں 47.6فیصد ودھ اے۔ سعودی عرب، امریکا، برطانیہ، یواے ای ترسیلات زر سانڳے اڳو رہین۔ 23 اگست کوں زرمبادلہ دے ذخائر دا حجم 14.8 ارب ڈالر ریکارڈ کتیا ڳیا ڄیندے اچ سٹیٹ بینک کولو زرمبادلہ دے ذخائر دا حجم 9.4 ارب ڈالر ھا۔ جولائی اچ براہ راست بیرونی سرمایہ کاری دا حجم 136 ملین ڈالر ریہا جیڑھا پچھلے سال جولائی دے مقابلہ اچ 63.7 فیصد وقدھ اے۔ غیرملکی نجی پورٹ فولیو سرمایہ کاری دا حجم 23.6 ملین ڈالر اتے سرکاری پورٹ فولیو سرمایہ کاری دا حجم 145 ملین ڈالر رہے۔ وزارت خزانہ دے مطابق حکومت دے مہنگائی اچ کمی دے اقدامات نال چنقے نتیجے نکلدے پن، زرعی شعبہ کوں قرضے ݙیوݨ اچ ودھارا تھئے، وݙیان صنعتاں دی پیداوار اچ مالی سال اچ 0.92 فیصد دی شرح نال نمو تھئی اے، پاکستان سٹاک مارکیٹ چنڳی کارکردگی ݙکھائی اے، کے ایس ای 100انڈیکس، مارکیٹ کیپٹلائزیشن اتے نویاں کمپنیاں دی رجسٹریشن اچ بہتری آئی اے۔
