غزہ ۔18ستمبر (اے پی پی) فلسطین دی وزارت صحت غزہ اچ شہید تھیوݨ آلے 34,344 بندیاں دے ناں جاری کر ݙتن۔ الجزیرہ موجب وزارت 649 صفحیاں دی ہک دستاویز جاری کیتی اے جئیں اچ گزریل سال اکتوبر اچ غزہ اچ اسرائیل دی جنگ شروع تھیوݨ دے بعد شہید تھیوݨ آلے 34,344 بندیاں دے ناں، تاریخ پیدائش اتے جنس درج کیتی ڳئی اے۔ جاری کیتی ڳئی پی ڈی ایف دستاویز 31 اگست کوں فلسطینی وزارت آپݨے ٹیلی گرام اکاؤنٹ تے شیئر کیتی ہئی۔ دستاویز دے پہلے 14 صفحیاں تے 710 نشوم ٻالاں دے ناں وی درج ہن جنہاں دی عمر اڄاں ہک سال وی کائنا تھی ہئی جو انہاں کوں موت دی نندر سمھا ݙتا ڳئیا۔ ایں فہرست اچ ہݨ تئیں غزہ اچ اسرائیلی جنگ اچ شہید تھیوݨ آلے ساریاں بندیاں دے ناں شامل کائنی جیڑھے جو وزارت موجب ڳھٹ توں ڳھٹ 41،252 بندے ہن۔
