بیروت۔23ستمبر (اے پی پی) لبنانی وزیر اعظم آکھیا جو او اسرائیل نال جنگ کوں روکݨ اتے کشیدگی توں بچݨ دی کوشش کریندے پئن اتے سارے محاذاں تے جنگ بندی دی حمایت کریندن۔ العربیہ نیوز موجب لبنان دے وزیر اعظم نجیب میقاتی گزریل ݙینھ العربیہ ایف ایم نال ڳالھ مہاڑ اچ خطے اچ امن کیتے سلامتی کونسل دی ساری قرارداداں دی حمایت دا عزم کیتا۔ انہاں آکھیا جو انہاں دی حکومت پوری لبنانی سرزمین تے ریاستی اختیار کوں ودھاوݨ چاہندی اے۔ انہاں غزہ اتے بحیرہ احمر دا حوالہ ݙیندیں ہوئیں آکھیا جو او سارے محاذاں تے جنگ بندی دی حمایت کریندن۔ انہاں آکھیا جو پیجرز اچ دھماکیاں اچ زخمی تھیوݨ آلے 1600 توں ودھ بندے اڄاں دی ہسپتال اچ زیرعلاج ہن۔ ݙوجھے پاسوں اسرائیلی چیف آف سٹاف ہرزی ہیلیوی ہک پریس کانفرنس اچ حزب اللہ تے ٻئے حملے کرݨ دا اعلان کریندیں ہوئیں دعویٰ کیتے جو اسرائیلی فوج کنے ایجھی صلاحیتاں ہن جیڑھی انہاں اڄاں تئیں استعمال نی کیتی۔
