اسلام آباد۔27ستمبر(اے پی پی)وزارت خزانہ آکھیے جو ملکی معیشت اتے اہم اقتصادی اشاریے مثبت سمت دو ودھدے پن، تجارتی و حسابات جاریہ دے خسارے ڳھٹدے پن، ملکی برآمدات اتے ترسیلات زر اچ کمی ݙتھی ویندی پئی اے، ملکی معیشت استحکام توں نمو دو ودھدا پئے، ستمبر اکتوبر اچ مہانگ دی شرح 8 توں 9 فیصد رہݨ دا امکان اے۔ اے ڳالھ وزارت خزانہ ماہانہ اقتصادی اپ ڈیٹ اچ ݙسائی اے۔ آکھیا ڳئے جو وݙیاں صنعتاں دی پیداوار ودھدی پئی اے، اہم برآمدی شعبے پیداوار اچ ودھارے کیتے تیار ہین جیندی وجہ مستحکم ایکسچینج ریٹ، افراط زر دے دبائو اچ کمی اتے کاروبار دوست ماحول اے، زری پالیسی اچ نرمی پاروں سرمایہ کاراں دا اعتماد بحال تھیندا پئے، عالمی معیشت دے استحکام نال پائیدار صنعتی ترقی دا عمل ٻیا چنڳاں تھیسی۔ اعلامیہ موجب ستمبر اچ ملکی برآمدات 2.5 ارب ڈالر توں 3 ارب ڈالر اتے درآمدات 4.5 ارب ڈالر توں 5 ارب ڈالر، ترسیلات زر دا حجم 2.7 ارب ڈالر توں 3.2 ارب ڈالر رہسی۔ جاری مالی سال دے پہلے ݙو مہینے اچ ترسیلات زر اچ 44 فیصد دا ودھارا تھئے، ایںد وران ترسیلات زر دا حجم 5.93 ارب ڈالر رہے ڄیڑھا پچھلے مالی سال دی ایں مُد اچ 4.124 ارب ڈالر ھا۔ ملکی برآمدات دا حجم 4.862 ارب ڈالر رہے جیڑھا پچھلے مالی سال دی ایں مد اچ 4.536 ارب ڈالر دے مقابلہ اچ 7.2 فیصد ودھ اے، درآمدات دا حجم 9.53 ارب ڈالر رہے جیڑھا پچھلے مالی سال دی ایں مد اچ 8.37 ارب ڈالر ھا۔ حسابات جاریہ دے کھاتیاں دا خسارہ 171 ملین ڈالر رہے جیڑھا پچھلے مالی سال دی ایں مد اچ 893 ملین ڈالر دے مقابلہ اچ 80.9 فیصد ڳھٹ اے۔ مجموعی غیر ملکی سرمایہ کاری دا حجم 350.3 ملین ڈالر رہے جیڑھا پچھلے مالی سال دی ایں مد اچ 225.2 ملین ڈالر دے مقابلہ اچ 55.5 فیصد ودھ اے۔ اگست اچ حسابات جاریہ دے کھاتیاں دا توازن 75 ملین ڈالر فاضل ریکارڈ کیتا گئے۔ مجموعی غیر ملکی سرمایہ کاری دا حجم 453.2 ملین ڈالر رہے جیڑھا پچھلے مالی سال دی ایں مد اچ 252 ملین ڈالر دے مقابلہ اچ 79.9 فیصد ودھ اے۔ 20 ستمبر 2023ء کوں زرمبادلہ دے ذخائر دا حجم 13.079 ریکارڈ کیتا گیا ھا ڄیڑھا 20 ستمبر 2024ء کوں 14.873 ارب ڈالر تھی گیا۔ پچھلے سال 20 ستمبر کوں ایکسچینج ریٹ 293.89 روپے ہا ڄیڑھا ایں سال 20 ستمبر کوں 277.84 روپے رہے۔ جولائی اچ ایف بی آر دے محاصل دا حجم 1.456 ٹریلین روپے ریکارڈ کیتا گیا جیڑھا پچھلے مالی سال دی ایں مد اچ 1.207 ٹریلین روپے دے مقابلہ اچ 20.6 فیصد ودھ اے۔ مالی خسارے دا حجم جولائی اچ 387.8 ارب روپے ریکارڈ کیتا گیا ڄیرحا پچھلے سال جولائی اچ 225.3 ارب روپے ھا۔ پرائمری بیلنس دا حجم 107.1 ارب روپے ریکارڈ کیتا گیا، پرائمری خسارہ اچ 65.6 فیصد کمی تھئی۔
