لاہور۔3اکتوبر(اے پی پی) پاکستان تے انگلینڈ وچال کھیݙی ونڄݨ آلی ترائے میچاں دی ٹیسٹ سیریز سانڳے میچ آفیشلز دا اعلان کرݙتا ڳئے ۔ ترجمان پی سی بی موجب اے سیریز آئی سی سی ورلڈ ٹیسٹ چیمپئن شپ دا حصہ اے جیں دا پہلا ٹیسٹ 7 توں 11 اکتوبر تئیں ملتان اچ تھیسی ۔ ݙوجھا ٹیسٹ وی ملتان اچ 15 توں 19 اکتوبر تئیں کھیݙیا ویسی جݙاں جو راولپنڈی 24 توں 28 اکتوبر تئیں تریجھے ٹیسٹ دی میزبانی کریسی ۔ویسٹ انڈیز دے سر رچی رچرڈسن ایں سیریز اچ میچ ریفری دی حیثیت نال پلیئنگ کنٹرول ٹیم دے سربراہ ہوسن۔او آئی سی سی دے ایلیٹ پینل آف میچ ریفریز دے ممبر ہن۔ پہلے ٹیسٹ سانڳے سری لنکا دے کمار دھرما سینا اتے بنگلہ دیش دے شرف الدولہ سیکت آن فیلڈ امپائرز ہوسن اے ݙوہیں آئی سی سی ایلیٹ پینل آف امپائرز اچ شامل ہن۔ نیوزی لینڈ دے کرسٹوفر گیفینی جیڑھے آئی سی سی ایلیٹ پینل آف امپائرز دا حصہ ہن تھرڈ امپائر ہوسن جݙاں جو پاکستان دے آصف یعقوب ( آئی سی سی انٹرنیشنل پینل آف امپائر) فورتھ امپائر دے فرائض نبھیسن ۔ݙوجھے ٹیسٹ سانڳے کمار دھرما سینا اتے کرسٹوفر گیفینی آن فیلڈ امپائرز دے فرائض نبھیسن جݙاں جو شرف الدولہ سیکت تھرڈ امپائر ہوسن۔ پاکستان دے راشد ریاض جیڑھے آئی سی سی انٹرنیشنل پینل آف امپائرز دا حصہ ہن، چوتھے امپائر ہوسن ۔راولپنڈی کرکٹ سٹیڈیم اچ تریجھے ٹیسٹ سانڳے کرسٹوفر گیفینی اتے شرف الدولہ سیکت آن فیلڈ امپائرز دے فرائض سرانجام ݙیسن جݙاں جو کمار دھرما سینا تھرڈ امپائر ہوسن۔ پاکستان دے فیصل آفریدی جیڑھے انٹرنیشنل پینل آف امپائرز اچ شامل ہن، چوتھے امپائر ہوسن۔
