دہشت گردی دا شکار تھیوݨ دے باوجود بھارتی سرپرستی اچ تھیوݨ آلی دہشت گردی کوں شکست ݙیوݨ دی طاقت ،عزم اتے صلاحیت رکھیندوں، پاکستان

اقوام متحدہ۔4اکتوبر(اے پی پی) پاکستان اقوام متحدہ اچ بھارتی سرپرستی اچ تھیوݨ آلی دہشت گردی روکݨ دا عزم کریندے آکھیے دہشت گردی دا شکار تھیوݨ دے باوجود پاکستان ٻاہرلی سرپرستی اچ تھیوݨ آلی دہشت گردی کوں شکست ݙیوݨ دی طاقت ، عزم اتے صلاحیت رکھیندے ، جیں کوں بھارت دی طرفوں مدد تے مالی تعاون کیتا ویندے۔ اقوام متحدہ اچ پاکستان دے قائم مقام مستقل نمائندے عثمان جدون گزریل ݙینھ جنرل اسمبلی دی قانونی (چھویں) کمیٹی بین الاقوامی دہشت گردی دے خاتمے دے اقدامات تے بحث اچ آکھیے اساں گزریل ݙو ݙھاکیں اچ دہشت گردی دے خلاف جنگ  لڑی اے،تاں جو دہشت گردی داخطرہ نویاں شکلاں بدلیندا رہ ویندے، انھاں ایں تناظر اچ دہشت گردی دی نویں قسم تے سائبر ٹولز بشمول کرپٹو کرنسیز اتے آن لائن دہشت گردی روکݨ سانڳے اقوام متحدہ دے انسداد دہشت گردی دے ڈھانچے دی تشکیل دی لوڑھ تے زور ݙتا۔ پاکستانی مندوب پوری دنیا اچ دہشت گردی مکاوݨ سانڳے غیر حل شدہ جھیڑیں دے حل ، غیر ملکی قبضے مکاوݨ تے خاص کر کشمیر اتے فلسطین اچ حق خود ارادیت   گھنݨ تے زور ݙتا۔ آپݨی تقریر دے شروع اچ  پاکستانی مندوب لبنان اچ جاری اسرائیلی  جارحیت اتے غزہ اچ اسرائیل دی طرفوں فلسطینیاں دی نسل کشی دی شدید مذمت کریندے آکھیے اسرائیل مشرق وسطیٰ دے پورے خطے اچ ھک وسیع جنگ کوں ہوا ݙیوݨ دی کوشش کریندا پئے تے ایں توں جواب گھنݨ ٻہوں ضروری اے ، جݙاں تئیں اساں ایں دہشت گرد حکومت دے خلاف تکڑے تھی تے کم نی کریندے تے اقوام متحدہ دے چارٹر اتے بین الاقوامی قانون کوں برقرار نی رکھیندے ،اساں تشدد اتے افراتفری دی دنیا اچ لہسوں جتھاں زندگی بدصورت، وحشیانہ تے مختصر اے۔ انہاں ایں ڳالھ کوں نشابر کریندے آکھیے پاکستان اچ دہشت گردی دے خلاف جنگ اچ 80 ہزار توں ودھ لوکاں آپݨی جاناں قربان کیتن ، انھاں آکھیے پاکستان ، فتنہ الخوارج ٹی ٹی پی، داعش اتے مجید بریگیڈ جیھے باغی گروپاں دے ذریعے ریاستی سرپرستی اچ تھیوݨ آلے سرحد پار حملیں دا شکار اے ۔پاکستانی مندوب آکھیے پاکستان کنے ٻاہرلی سرپرستی اچ تھیوݨ آلی دہشت گردی کوں شکست ݙیوݨ دی طاقت ، تے صلاحیت اے، جیں کوں ساݙے  مشرقی پڑوسی ملک دی طرفوں فعال طور تے مدد، حوصلہ افزائی اتے مالی مدد ݙتی ویندی اے ۔پاکستانی مندوب آکھیے عالمی برادری دی ذمہ واری اے جو او ایں ڳالھ کوں یقینی بݨاوے انسداد دہشت گردی دیاں کوششاں کوں انسانی حقوق اتے بین الاقوامی انسانی قانون دی خلاف ورزی سانڳے غلط استعمال نہ کیتا ونڄے جیویں جو اسرائیل مقبوضہ فلسطین اچ اتے بھارت جموں و کشمیر اچ کریندا پئے ، پاکستان اسلامی تعاون تنظیم (او آئی سی) دے ایں موقف دی مکمل حمایت کریندے جو بین الاقوامی دہشت گردی تے اتفاق رائے تے مبنی جامع کنونشن (سی سی آئی ٹی) کوں دہشت گردی دی کارروائیاں اتے غیر ملکی  قبضے اچ حق خود ارادیت اتے قومی آزادی سانڳے لوکاں دی جائز جدوجہد وچال واضح طور تے فرق کرݨا چاہیدے ، انھاں آکھیے دہشت گردی دی کوئی وی تعریف، بشمول ھک جامع کنونشن اچ انتہا پسندی اتے دہشت گردی دی نویں ابھردی ہوئی شکلاں کوں رلاوݨا چاہیدے جیں اچ سفید فام بالادستی، سڄے ہتھ دے انتہا پسنداں، پر تشدد  قوم پرستاں، زینو فوبک(غیر ملکیاں نال نفرت)، اسلامو فوبک اتے مسلم مخالف گروپاں دی پرتشدد کارروائیاں جیویں جو ہندوتوا گروپس اتے دنیا دے مختلف حصیں اچ ایں طرح دے نظریات شامل ہن۔   پاکستانی مندوب آکھیے اقوام متحدہ دے انسداد دہشت گردی دے ڈھانچے اتے پابندیاں دے نظام اچ تبدیلیاں دی لوڑھ تے زور ݙتا۔ ایں موقع تے بھارتی مندوب جواب ݙتے تے دعوی کیتے جموں و کشمیر بھارت دا اٹوٹ انگ اے تے پاکستان تے دہشت گردی  دا الزام لاتے۔  پاکستانی مندوب جواد اجمل آپݨے بھارتی ہم منصب دے الزام مسترد کریندے مطالبہ کیتے جو او اقوام متحدہ دی سلامتی کونسل دی قرارداداں دی پاسداری کرے جیڑھے کشمیری عوام کوں آپݨے حق خود ارادیت دے استعمال سانڳے ݙیندن ۔ اقوام متحدہ اچ پاکستان مشن اچ فرسٹ سیکرٹری جواد اجمل  آکھیے اے بدقسمتی دی ڳالھ اے جو بھارت، جیڑھا خود جموں و کشمیر دے مقبوضہ علاقیں اچ انتہائی وحشیانہ ریاستی دہشت گردی دا ارتکاب کریندا پئے تے عالمی سطح تے دہشت گردی دی سرپرستی کریندا پئے ݙوجھیں تے ایہو جیھے کوڑے الزام لیندا پئے لیکن اے بین الاقوامی قانون دی سنگین خلاف ورزی کرݨ آلیں اچ عام اے جیڑھے آپݨے پڑوسیاں دے خلاف کھلے عام جارحیت دا ارتکاب کریندن ۔ جواد اجمل  آکھیے دنیا وݙے عرصے توں بھارت دے ناقابل قبول رویے بارے انتباہ کوں نظر انداز کیتے جیڑھا نفرت اتے تشدد توں متاثر اے تے نظریاتی طور تے حوصلہ افزائی کرݨ آلے ایندی حکومت دے ہندوتوا گروپ دا مظہر اے۔ جیں دے نتیجے اچ بھارتی دہشت گرد فرنچائز ٻاہرلے ملک رہݨ آلے آپݨے مخالفین دے خلاف قاتلانہ مہمات دی کوششاں دے ھک سلسلے دے نال عالمی سطح تے چلی ڳئی اے جیڑھا جو کینیڈا اتے امریکا اچ بے نقاب تھی چکی اے جݙاں جو بھارتی رہنما کھلے عام آپݨے شہریاں کوں ٻاہرلے ملک قتل کرݨ تے ماݨ کریندن۔