اسلام آباد۔10اکتوبر (اے پی پی) وفاقی وزیر سرمایہ کاری تے نجکاری عبدالعلیم خان آکھیا جو پاکستان سعودی عرب بزنس فورم دے ذریعے ݙوہیں ملکاں وچال مضبوط اقتصادی تعاون نال پاکستان دی معیشت ترقی کریسی اتے معاشی استحکام دے نال نال عوامی فلاح تے بہبود دے موقع وی ودھسن۔ پاکستان اچ سرمایہ کاری کیتے سعودی حکومت اتے بزنس کمیونٹی نال تعاون کریسوں۔ سعودی سرمایہ کاراں کوں پاکستان اچ توانائی، زراعت، انفراسٹرکچر، اتے ٹیکنالوجی سودھے مختلف شعبیاں اچ موقع دستیاب ہن۔ اے ڳالھیں انہاں خمیس کوں پاکستان سعودی عرب بزنس فورم توں خطاب کریندیں ہوئیں آکھی۔ ایں فورم دامقصد ݙوہیں ملکاں وچال تجارتی تعلقات کوں ودھاوݨ اتے سرمایہ کاری دے موقع بہتر کرݨ اے۔ انہاں آکھیا جو پاکستان اچ سرمایہ کاری دے ٻہوں موقع ہن اتے انہاں توں فیدہ چاوݨ کیتے سعودی حکومت اتے بزنس کمیونٹی نال تعاون کریسوں۔ انہاں آکھیا جو ہر اوکھ اچ پاکستان دا ساتھ ݙیوݨ تے سعودی حکومت دا خصوصی شکریہ ادا کریندوں۔ وفاقی وزیرآکھیا جو پاکستانی حکومت اداریاں اچ جیڑھی پالیسی ریفارمز کیتن او سعودی سرمایہ کاراں کوں پاکستان اچ سرمایہ کاری آلے پاسے راغب کریسن۔ انہاں آکھیا جو بہتر پالیسیاں دے نیتجے اچ سعودی سرمایہ کاراں کوں پاکستان اچ سرمایہ کاری دے موقع ودھ پرکشش نظر امسن۔ انہاں آکھیا جو پاکستانی حکومت اڄوکے سالاں اچ جیڑھی پالیسی ریفارمز کیتن انہاں دا مقصد سرمایہ کاری دے ماحول کوں بہتر ٻݨاوݨ اتے غیر ملکی سرمایہ کاراں کوں پاکستان اچ کاروبار کیتے ٻئے سوکھ ݙیوݨ اے۔ حکومت آئی ٹی اتے ڈیجیٹل معیشت دے ودھارے کیتے کئی نویں پالیسیز متعارف کرائن۔ انہاں آکھیا جو پاکستان سعودی عرب بزنس فورم سویں پلیٹ فارمز پاکستان دی معیشت کیتے ٻہوں اہم ہن اتے انہاں نال معاشی ترقی دی رفتار تیز تھی سڳدی اے۔ اے فورم ݙوہیں ملکاں وچال کاروباری موقع ودھاوݨ اتے ݙوپاسہ اقتصادی تعاون کوں ودھاوݨ دا موقع ݙیندن۔
