اسلام آباد۔10اکتوبر (اے پی پی) وفاقی وزیر توانائی( پٹرولیم ڈویژن) ڈاکٹر مصدق مسعود ملک آکھیا جو پاکستان سعودی عرب نال تعلقات کوں ترقیاتی سانجھے داری اچ بدلݨ چاہندے، ایس آئی ایف سی سعودی سرمایہ کاراں کوں پورا تعاون ݙیسی۔ پاکستان اچ سرمایہ کاری دے ٻہوں موقع موجود ہن۔ ،خصوصی سرمایہ کاری سہولت کونسل (ایس آئی ایف سی) سعودی سرمایہ کاراں نال پورا تعاون کریسی۔ سعودی عرب اچ پٹرولیم دے خام مال دے ٻہوں وسائل موجود ہن جڈانجو پاکستان پٹرولیم مصنوعات کوں استعمال کرݨ دی وݙی مارکیٹ موجود اے۔ خمیس کوں پاکستان سعودی عرب بزنس فورم توں خطاب کریندیں ہوئیں وزیر پٹرولیم ڈاکٹر مصدق ملک آکھیا جو ایندے اچ کوئی شک کائنی جو پاکستان اتے سعودی عرب وچال تاریخی برادرانہ تعلقات ہن اتے پاکستان دا مقصد سعودی عرب نال آپݨے پراݨے تعلقات اتے ثقافتی تعلقات کوں ترقی اتے رتقی تے سانجھے داری اچ بدلݨ اے۔ انہاں آکھیا جو سعودی عرب ایجھا ملک اے جیڑھا پاکستان دا شروع ݙینھ توں ہمدرد رہیے۔ وفاقی وزیر پٹرولیم ݙوپاسہ تعلقات کوں مضبوط ٻݨاوݨ دی اہمیت اتے آپسی اقتصادی اتے ترقیاتی پیش رفت کوں ودھاوݨ کیتے سعودی عرب نال تعاون کوں ودھاݨ دی خواہش تے زور ݙتے۔ سٹریٹیجیکلی سعودی عرب اتے پاکستان ہمیشہ ہک ݙوجھے نال تعاون کیتے۔ سعودی عرب اچ مقدس جہیں دی حفاظت کیتے پاکستانی مسلمان ہر ویلھے آپݨی جان دا قربان کرݨ کیتے تیار رہندن۔ انہاں فوڈ سکیورٹی، اقتصادی ترقی اتے توانائی دے تحفظ سویں اہم شعبیاں اچ تعاون کوں ودھاوݨ اچ پاکستان دی دلچسپی ݙکھائی اے۔ انہاں آکھیا جو سعودی عرب دا وژن گروتھ اے جڈانجو پاکستان دا ویژن ایکسپورٹ اے۔ صنعتی انقلاب امدا پئے جئیں کیتے ݙوہیں ملکاں نال ہتھ رلا تے اڳوں ودھݨ کوں تیار ہیسے۔ وفاقی وزیر آکھیا جو پاکستان دی ترجیحات برآمدات کوں ودھاوݨ ، آپݨی معیشت کوں ودھاوݨ، ترسیلات ودھاوݨ روزگار دے موقع پید اکرݨ اتے پیداواری صلاحیت ودھاوݨ اے جڈانجو سعودی عرب دی ترجیحات ترقی، تنوع، توانائی اچ اڳوں ودھݨ اے۔ انہاں آکھیا جو پاکستان کاروبار اچ سوکھ ݙیوݨ کیتے توجہ ݙیندا پئے۔ ’’ریڈ ٹیپ توں ریڈ کارپٹ‘‘ تے منتقل تھیندا پئے اتے اعلیٰ ٹیکس ٹو جی ڈی پی تناسب دے ذریعے غریبی مکاوݨ تے کم کریندا پئے۔ انہاں آکھیا جو سعودی عرب وژن 2030 دی شاندار امنگاں کیتے ایکسپریس وے اے اتے پاکستان ہک پرامن پڑوس ملکاں اچ پائیدار ترقی کیتے کوشش کریندا پئے۔ وفاقی وزیر آکھیا جو پاکستان آچ مائینگ ریسورسز وافر مقدار اچ ہن جئیں توں سعودی عرب فیدہ چا سڳدے۔ سعودی عرب کوں کنسٹرکشن کیتے خام مال پاکستان ݙے سڳدے۔ اساݙے شمالی علاقیاں اچ وافر مقدار اچ پتھر، ماربل اتے معدنیات موجود ہن۔ مصدق ملک آکھیاجو سعودی عرب انفارمیشن ٹیکنالوجی اچ اڳوں ودھدا پئے۔ مصنوعی ذہانت دے شعبے اچ ترقی کریندا پئے۔ ٹیکنالوجی دے نویں بزنس ماڈل ٻݨیندا پئے جئیں کیتے آئی ٹی ایکسپرٹ چاہیدن اتے پاکستان کنے بہترین انجینئرز ہن۔ وفاقی وزیرآکھیا جو پاکستان کوں سڑکاں، ریلوے اتے انفراسٹرکچر اچ نشابر ترقی دی لوڑھ اے۔ پاکستان سعودی عرب کیتے ہنرمند افرادی قوت ݙے سڳدے۔ انہاں سعودی عرب دے وژن 2030 دی ٻئی وضاحت کیتی جئیں اچ 13 اسٹریٹجک شعبیاں تے توجہ ݙتی ڳئی اے جنہاں اچ ایوی ایشن، آٹوموٹیو، کنسٹرکشن، کنزیومر ریٹیل، تفریح، مالیاتی خدمات، خوراک اتے زراعت، کان کنی، رئیل اسٹیٹ، ٹیلی کام، میڈیا اینڈ ٹیکنالوجی، ٹرانسپورٹ، ہیلتھ کیئر، اتے توانائی ہن انہاں اچوں ٻہوں شعبیاں اچ تعاون اچ پاکستان دلچسپی ݙکھائی اے۔ انہاں آکھیا جو انہاں شعبیاں اچ سرمایہ کاری دا مقصد اعلیٰ منافع اتے سٹریٹجک قدر پیدا کرݨ اے۔ ڈاکٹر مصدق ملک پاکستان آوݨ تے سعودی عرب دے وفد دا شکریہ ادا کیتا اتے آکھیا جو اساں رَل تے انقلاب ڳھن امسوں۔
