پرتھ ۔10نومبر(اے پی پی) پاکستان 22 سال بعد آسٹریلیا کوں انھاں دی سرزمین تے ہرا تے ھک ݙینھ وار بین الاقوامی کرکٹ سیریز جت تے تاریخ رقم کرݙتی اے ، پاکستان آسٹریلیا دی طرفوں تریجھے تے چھیکڑی ھک ݙینھ وار بین الاقوامی میچ اچ مقررہ 141 رنز دا ہدف 27 ویں اوور اچ ݙو وکٹاں دے ضیان تے گھن ڳھدا ، صائم ایوب 42 رنز تے عبداللہ شفیق 37 رنز نال اڳوں رہیے ، پاکستان دی طرفوں نسیم شاہ اتے شاہین شاہ آفریدی 3، 3 حارث رؤف 2 جݙاں جو محمد حسنین ھک وکٹ ڳھدی ۔ پرتھ اچ کھیݙیے ڳئے سیریز دے چھیکڑی ھک ݙینھ وار بین الاقوامی میچ اچ پاکستانی ٹیم ٹاس جت تے آسٹریلیا کوں پہلے بیٹنگ دی دعوت ݙتی ۔ آسٹریلیا پہلے بیٹنگ کریندے 140 رنز بݨائے ۔ آسٹریلیا دی طرفوں سین ایبٹ 30 رنز بݨا تے اڳوں رہیے ، جیک فریزر میکگورک صرف 7 رنز بݨاوݨ دے بعد آؤٹ تھئے تے میتھیو شارٹ 22 رنز دی اننگز کھیݙی۔کپتان جوش انگلس وی 7 ہی رنز بݨِا سڳیے ، ایرون ہارڈی 12 رنز اسکور کیتے، کوپر کونولی 7 رنز تے ریٹائرڈ ہرٹ تھی ڳئے ، محمد حسنین دی گیند انھاں دے ہتھ تے لڳی جیں توں او انجرڈ تھی ڳئے ۔گلین میکسویل مسلسل تریجھے میچ اچ حارث رؤف دا شکار بݨیے، او صفر تے ہی پویلین واپس ٹر ڳئے ، آل راؤنڈر مارکس اسٹونئس وی 8 رنز ہی بݨا سڳیے ، ایڈم زمپا 13 رنز بݨائے۔ پاکستانی بائولرز شاندار باؤلنگ کریندے 31.5 اووراں اچ آسٹریلیا دے 9 کھلاڑی 140 رنز تے آؤٹ کرݙتے جݙاں جو ھک کھلاڑی انجری پاروں ول بیٹنگ سانڳے میدان اچ کائنی آئے ۔ پاکستان 141 رنز دا ہدف 27ویں اوور اچ جُھݨ ڳھدا ، کپتان محمد رضوان اتے بابر اعظم بالترتیب 30 اتے 28 رنز بݨا تے ناقابلِ شکست رہیے۔ اوپنرعبداللہ شفیق 37 اتے صائم ایوب 42 رنز بݨا تے لانس مورس دی گیند دا شکار تھئے۔ واضح رہے جو ایندے توں پہلے 2002 اچ پاکستان کرکٹ ٹیم کپتان وسیم اکرم دی قیادت اچ کینگروز دے خلاف آسٹریلیا اچ ھک ݙینھ وار بین الاقوامی کرکٹ سیریز جتی ہئی۔ سیریز اچ پہلا میچ آسٹریلیا جت تے پاکستان دے خلاف پہلی کامیابی ڳھدی ہئی جݙاں جو سیریز دے چھیکڑی ݙوہیں میچ پاکستان جت تے سیریز آپݨے ناں کر ڳھدی۔
