واشنگٹن۔15نومبر (اے پی پی) امریکا کوئٹہ اچ ریلوے سٹیشن تے تھیوݨ آلے بم دھماکے دی مذمت کریندے آکھیے امریکا دہشت گردی دے خلاف جنگ اچ پاکستان دے نال مونڈھے نال مونڈھا رلائی کھڑے ۔ امریکی محکمہ خارجہ دے پرنسپل نائب ترجمان ویدانت پٹیل معمول دی پریس بریفنگ اچ گزریل ݙینھ آکھیے اساں 9 نومبر کوں کوئٹہ ریلوے سٹیشن تے تھیوݨ آلے بم دھماکے دی شدید مذمت اتے متاثرین تے انھاں دے گھر آلیں نال تعزیت کریندوں ۔ انھاں پاکستانی نمائندے دے ھک سوال دے جواب اچ آکھیے پاکستان نال ایں قسم دے خطریں نال نبݨݨ اچ ساݙا مشترکہ مفاد اے ۔ انھاں آکھیے اساں علاقائی سلامتی سانڳے سانجھا عزم رکھیندوں ۔ ویدانت پٹیل آکھیے اساں 2019 اچ ایویں ہی کیتا ہئی تے اڄ وی اساں دہشت گردی اتے پرتشدد انتہا پسندی دے خلاف جنگ اچ پاکستان دے مونڈھے نال مونڈھا رلائی کھڑے رہسوں۔
