رام اللہ۔18نومبر (اے پی پی) فلسطینی ایوان صدر شمالی اتے وسطی غزہ دی پٹی اچ اسرائیلی حملیاں دی مذمت کریندیں ہوئیں امریکی انتظامیہ کوں ایندا ذمہ وار قرار ݙے ݙتا۔شنہوا موجب فلسطینی ایوان صدر دے ترجمان نبیل ابو رودینہ گزریل ݙینھ بیان اچ آکھیا جو اسرائیل مسلسل امریکی فوجی، مالی اتے سیاسی مدد کوں فلسطینی شہریاں کوں مارݨ کیتے استعمال کریندے۔ انہاں امریکی انتظامیہ کوں غزہ اچ خونی جارحیت دے تسلسل کیتے ذمہ وار آکھیے۔ فلسطینی وزارت خارجہ غزہ دی پٹی اچ فلسطینیاں دی مسلسل بے گھری اتے فاقہ کشی دا ذمہ دار عالمی برادری کوں قرار ݙتے۔ وزارت خارجہ گزریل ݙینھ پریس بیان اچ اسرائیل کوں اقوام متحدہ دی قرارداداں اتے احکامات تے عمل درآمد کیتے مجبور کرݨ کیتے فوری بین الاقوامی کاروائی دا مطالبہ کیتے۔ غزہ اچ صحت دے حکام آکھیا جو غزہ دی پٹی اچ اسرائیلی حملیاں اچ شہید تھیوݨ آلے فلسطینیاں دی تعداد 43 ہزار 846 تھی ڳئی اے۔
