اسلام آباد ۔1دسمبر(اے پی پی) پاکستان پیپلز پارٹی دے رہنما اتے سابق ممبرقومی اسمبلی و پارلیمانی سیکرٹری مخدوم سید علی حسن گیلانی ٹریفک حادثے اچ وفات پاڳئن۔ تفصیل موجب اوچ شریف دے نیڑے نبی پور اچ ٹریفک حادثے اچ سابق رکن قومی اسمبلی 52 سالہ مخدوم سید علی حسن گیلانی سودھے ݙو بندے وفات پاڳئن ۔حادثہ سڑک تے کھڑے منی ٹرک کوں تکھی رفتار کار دی ٹکر لڳݨ پاروں پیش آئے ، پیپلز پارٹی دے ڈویژنل جنرل سیکرٹری مخدوم سید علی حسن گیلانی سنڳتیاں دے رلے احمد پور شرقیہ توں اوچ شریف آندے پئے ہن۔ کار اچ سوار 3 زخمیاں دی حالت نازک ݙسائی ویندی پئی اے ، لاشاں تے زخمیاں کوں ٹی ایچ کیو ہسپتال منتقل کرݙتا ڳئے ،ݙوجھے جاں بحق تھیوݨ آلے بندے دی شناخت 57 سالہ محمد اکبر دے ناں نال تھئی اے ، جݙاں جو زخمیاں اچ 30 سالہ سلطان، 45 سالہ حنیف اتے 55 سالہ جند وݙا شامل ہن۔ حادثے اچ جاں بحق تھیوݨ آلے مخدوم سید علی حسن گیلانی پاکستان پیپلز پارٹی دے ٹکٹ تے 2 واری ایم این اے منتخب تھئے ہن ۔ مرحوم فروری 2024 دے انتخابات اچ وی پاکستان پیپلز پارٹی دے ایم این اے دے امیدوار ہن، جݙاں جو سابق وزیراعظم تے موجودہ چیئرمین سینیٹ یوسف رضا گیلانی دے قریبی رشتے دار وی ہن ۔مخدوم سید علی حسن گیلانی دی وفات تے صدرمملکت آصف علی زرداری، وزیراعظم شہباز شریف، وزیراعلیٰ پنجاب مریم نواز ݙکھ تے افسوس کیتے انہاں دی مغفرت اتے اُچے درجات دی دعا منڳی۔انہاں دی رہائش گاہ غوث الاعظم ہاؤس اوچ شریف اچ انہاں دے بھرا ممبر صوبائی اسمبلی سید عامرعلی شاہ، انہاں دے چاچے سابق ایم پی اے تے سجادہ نشین دربار عالیہ غوثیہ محبوب سبحانی رح مخدوم الملک مخدوم سید افتخار حسن گیلانی ، مخدوم سید مزمل عون بخاری، مخدوم سید حسنات بخاری، مخدوم سید جعفر حسین بخاری سودھے ٻہوں سارے انہاں دے چاہݨ آلے تے اہل علاقہ دی وݙی تعداد تعزیت سانڳے موجود اے۔
