ملتان۔ 05 دسمبر (اے پی پی) ملتان اچ پیو ݙو پتراں اتے ذال کوں قتل کر تے خودسوزی کر ڳھدی اے۔ متعلقہ تھاݨاں الپہ پولیس موجب خمیس کوں چونگی نمبر نو دے رہݨ آلے 35 سالہ معروف ولد طارق نعیم آپݨے ݙو پتراں پںج سالہ علیان، ترائے سالہ اریان اتے 35 سالہ ذال اقراء بی بی کوں قتل کرݨ دے بعد خودسوزی کر ڳھدی۔ پولیس موجب ڈی ایچ اے ملتان اچ نجی بینک دے سامھے چار بندیاں کوں گولی لڳݨ دی اطلاع ملی۔ متعلقہ پولیس ٹیم اطلاع ملدیں ای موقع تے پڄ ڳئی اتے ریسکیو 1122 امدادی ٹیم کوں وی اطلاع ݙے ݙتی۔ پولیس ٻیا ݙسیا جو تحقیقات موجب خودسوزی کرݨ آلا بندہ معروف سیاسی رہنما طارق نعیم اللہ دے پتر اتے سابق ممبر صوبائی اسمبلی شاہدخان دا بھتریجا ہئی جیڑھا آپݨے ݙو پتراں اتے ذال نال ڈی ایچ اے ملتان اچ بینک توں رقم کݙھواوݨ کیتے ڳئیا۔ بینک توں ٻاہر نکل تے اوندی ذال نال تقرار شروع تھی ڳئی۔ ایں وچال اوں پستول کݙھ تے آپݨے ݙو پتر علیان، ریان اتے ذال اقراء کوں فائر مارتے خود کوں وی گولی مار ݙتی۔ گولی لڳݨ پاروں ݙوہیں ٻال موقع تے جاں بحق تھی ڳئے جڈانجو ذال اتے پئے کوں زخمی حالت اچ نشتر ہسپتال پڄایا ڳئیا جتھ او وی جان دی بازی ہر ڳئے۔ پولیس واقعے دی ڄاہ توں شواہد کٹھے کر تے معاملہ دا مقدمہ درج کر تے تحقیقات شروع کر ݙتی اے اتے لاشاں کوں نشتر ہسپتال دے سرد خانے اچ رکھوا ݙتا ڳئے۔
