اسلام آباد۔18دسمبر (اے پی پی) وفاقی وزیرخزانہ تے محصولات سینیٹرمحمداورنگزیب آکھیا جو معاشی میدان اچ پیشرفت جاری اے، پاکستان دی کریڈٹ ریٹنگ اچ بہتری دی امید اے، مالی سال دے چھیکڑ تے اساݙے کول درآمدی کور ترائے مہینے دا تھی ویسی، پاکستان دی کریڈٹ ریٹنگ اچ بہتری دی امید اے۔ بدھ کوں کابینہ دے اقتصادی رابطہ کمیٹی دے اجلاس اچ ڳالھ مہاڑ کریندیں ہوئیں انہاں آکھیا جو معاشی میدان اچ کامیابیاں دا سلسلہ جاری اے۔ معاشی استحکام کوں پائیدار بنیاداں تے چلاوݨ کیتے اقدامات کیتے ویندے پئن۔ نومبر2024 اچ حسابات جاریہ دے کھاتیاں دا توازن فاضل رہیے۔ اینویں ترسیلات زر اچ وی نشابر ودھارا تھیے۔ ترسیلات زر اچ سالانہ بنیاداں تے35فیصد دی نمو تھئی اے۔ مانیٹری کمیٹی دے اجلاس اچ گورنرسٹیٹ بینک امید کیتی جو جاری مالی سال اچ ترسیلات زرداحجم 35ارب ڈالرتوں ودھ ویسی، گزریل مالی سال اچ 30.2 ارب ڈالر دی ترسیلات زر تھین۔ وزیرخزانہ آکھیاجو روشن ڈیجیٹل اکائونٹس دے ذریعہ ترسیلات زرداحجم 9ارب ڈالرتوں ودھ ڳئے۔ انہاں آکھیاجو زرمبادلہ دے ذخائر وی ودھ ڳئن۔ 16 مہینے پہلے اساݙے کول ݙوہفتیاں دا کور ہئی جیڑھا ہݨ 2.6 مہینے دا تھی ڳئے۔ ساݙھے چھی سال پہلے افراط زر دی شرح 5فیصد ہئی جیڑھی ہݨ نومبر اچ 4.9 فیصد ریکارڈ کیتی ڳئی اے۔ پالیسی ریٹ 13 فیصد ݙہہہ ڳئے۔ امید اے پیشرفت دا اے سلسلہ جاری رہسی۔
