اسلام آباد۔18دسمبر(اے پی پی)کابینہ دی اقتصادی رابطہ کمیٹی (ای سی سی) طویل المیعاد و پائیدار اقتصادی ترقی اتے روزگار دے مواقع ݙیوݨ کیتے سرکاری ونجی شعبہ دی شراکت داری ودھاوݨ تے زور ݙتے۔ کمیٹی کوں ݙسایا ڳئے جو حکومت زرعی، صنعتی و بنیادی ڈھانچہ دے اہم شعبیاں اچ سرمایہ کاری ودھاوݨ، اقتصادی تنوع اڳونہا کرݨ اتے مالیاتی نظام سانڳے اصلاحات کریندی رہسی۔ اجلاس اچ وفاقی وزیرخزانہ و محصولات ملک دے اقتصادی منظرنامہ دا جائزہ پیش کریندے حکومت ولوں اقتصادی استحکام کوں پائیدار نمو دو ڳھن ونڄݨ کیتے اقدامات دا ݙسائے اتے آکھیے جو معاشی میدان اچ کامیابیاں ملدیاں پن، نومبر اچ حسابات جاریہ دے کھاتیاں دا توازن وادھو رہے اتے ݙاہ سال اے اے سب توں ودھ شرح اے، ترسیلات زر وی ودھین اتے ایندے اچ سالانہ بنیاداں تے 35 فیصد دی نمو تھئی اے اتے ایندے اچ ٻئے ودھوتری دا امکان اے۔ وزیر خزانہ آکھیا جو روشن ڈیجیٹل اکائونٹس توں ترسیلات زر دا حجم 9 ارب ڈالر توں ودھ ڳئے جیڑھا پچھلے مالی سال توں سالانہ بنیاداں تے 31 فیصد ودھ رہے، ٹیکنالوجی دی برآمدات 25 فیصد ودھین، ٹیکسٹائل برآمدات، زرمبادلہ دے ذخائر ودھدے پن، ودھدا درآمدی کور پاکستان دی ریٹنگ کیتے ٻہوں اہم اے جیندے نال ساݙی کریڈٹ ریٹنگ بہتر تھیسی۔ انہاں آکھیا جو افراط زر دی صورتحال بہتر تھئی اے، پالیسی ریٹ 13 فیصد تئیں ݙھے ڳئے، صنعتی ترقی کیتے وی چنڳیاں خبراں ہین۔ وزیر خزانہ اکھیا جو غیر ملکی سرمایہ کاراں اتے کاروباری شعبے دا اعتماد ودھدا پئے۔ اجلاس اچ ضروری اشیاء اتے خدمات دی قیمتاں اچ کمی دا وی ݙسایا ڳیا جیندے اچ اٹا، کݨک، مرچ، ڈیزل، پیٹرول، دالاں، وصل، باسمتی چاول، بجلی دے بل، کھنݙ، روٹی، چاہ، صابݨ، مرغی، انڈے، ٹماٹر، تھوم، کاٹھی اتے لوݨ شامل اے۔ انہاں قیمتاں اچ کمی داجائزہ وی پیش کیتے اتے نیشنل پرائس مانیٹرنگ کمیٹی اتے صوبائی حکومتاں کوں ضروری اشیاء دی رسد دے بہاؤ تے اکھ رکھݨ اتے ناجائز قیمتاں ودھݨ دے خلاف اقدامات دی ہدایت کیتی۔
