غزہ۔8جنوری (اے پی پی) غزہ دے جنوبی علاقے خان یونس تے اسرائیلی بمباری نال ست ٻالاں سودھے 13 فلسطینی شہید تھی ڳئے۔ العربیہ نیوز موجب شہری دفاع اتے وزارت صحت دی رپورٹ اچ ݙسیا ڳئیا جو جنوبی غزہ دی پٹی دے شہر خان یونس تے اسرائیلی حملیاں اچ ست ٻالاں سودھے 13 فلسطینی شہید تھی ڳئن۔ سول ڈیفنس خان یونس دے مغرب اچ بے گھر لوکاں دی خیمہ وستی تے اسرائیلی حملے اچ چار ٻالآں دی شہادت تے 20 زخمیاں کوں منتقل کرݨ دا اعلان کیتے۔ ایں توں انڄ سول ڈیفنس ہک ٻئے بیان اچ اعلان کیتے جو خان یونس دے جنوب اچ علاقے قیزان اچ ہک رہائشی مکان تے اسرائیلی بمباری دے بعد ترائے ٻالاں سودھے پںج بندے شہید تھی ڳئن۔ انہاں ݙسیا جو خان یونس دے جنوب مشرق اچ اسرائیلی حملے اچ ہک کار کوں نشانہ ٻݨایا ڳئیا جئیں اچ ݙوفلسطینی شہید تھی ڳئن۔ ایندے علاوہ شہر دے ادھ اچ ہک رہائشی اپارٹمنٹ تے بمباری اچ ݙو فلسطینی شہید تھی ڳئن۔
