اسلام آباد۔14جنوری (اے پی پی) وفاقی وزیرخزانہ تے محصولات سینیٹرمحمداورنگزیب آکھیا جو پاکستان آپݨی مارکیٹ کوں چینی کیپیٹل مارکیٹ نال ٻیا جوڑݨ کیتے جون تئیں پانڈا بانڈ جاری کرݨ چاہندوں، پاکستان اچ چینی کمپنیاں دے تحفظ کیتے سکیورٹی ودھائی ویسی۔ پاکستان اچ سکیورٹی دے حالات بہتر تھین۔ چین دے ساؤتھ چائنا مارننگ پوسٹ کوں انٹرویو اچ وزیرخزانہ آکھیا جو پاکستان چینی سرمایہ کاراں توں 200 توں 250 ملین ڈالر کٹھا کرݨ چاہندے۔ مصر دی طرز تے یوآن بانڈز دے اجرا دی بنک گارنٹی کیتے ایشین انفراسٹرکچر انویسٹمنٹ بنک نال ڳالھ مہاڑ چلدی پئی اے۔ انہاں آکھیا جو پاکستان آوݨ آلے مہینیاں اچ آپݨی کرنٹ کریڈت ریٹنگ کوں سنگل بی اچ بدلݨ کیتے پرعزم اے۔ وزیرخزانہ آکھیا جو پاکستان دے معاشی استحکام کیتے چینی سرمایہ کاری ٻہوں اہم اے۔ چین پاکستان اقتصادی راہداری کوں ملکی معیشت کیتے اہم قرار ݙیندیں ہوئیں وزیرخزانہ آکھیا جو پاکستان سی پیک دے اگلے فیز اچ چین توں ٻئیا تعاون منڳدے۔ سی پیک دے اگلے فیز اچ خصوصی اقتصادی زونز، زراعت اتے انفارمیشن ٹیکنالوجی شعبیاں کوں ودھایا ویسی۔ انہاں آکھیا جو چین دے نجی شعبے اتے برآمدی صنعتاں کوں پاکستان اچ سرمایہ کاری کرݨی چاہیدی اے۔ سی پیک ٹو اچ برآمدی صنعتاں دی ترجیح نال قرض ادائیگی کوں سوکھا کیتا ویسی۔ پاکستان چین دے نال نال چینی خطہ ہانگ کانگ توں کاروباری شراکتاں اتے ہانگ کانگ سٹاک اچ پاکستانی کمپنیاں دی شرکت چاہندے۔
