اسلام آباد۔20جنوری(اے پی پی) وفاقی وزیر اطلاعات و نشریات عطاءاللہ تارڑ جنگ گروپ دے زیر اہتمام میڈیا کرکٹ لیگ دے انعقاد کوں خوش آئند قرار ݙیندے آکھیے کھیݙاں دے میداناں کوں آباد رہݨا چاہیدے، چیمپئنز ٹرافی دے پاکستان اچ انعقاد سانڳے انتظامات مکمل کرڳھدے ڳئن اے سال پاکستان دی کامیابیاں دا سال اے، سٹاک مارکیٹ تاریخ دی اتلی ترین سطح تے ہے ، ملک دی معیشت بہتری دے پاسے گامزن اے ، 8 فروری دا ݙینھ تعمیر و ترقی دے طور تے منیسوں ، معاشی استحکام سیاسی استحکام نال جڑیا ہویا اے ۔ شالیمار کرکٹ گرائونڈ اچ جنگ گروپ دے اہتمام نال میڈیا کرکٹ لیگ 2025ءدی اختتامی تقریب دے موقع تے میڈیا نال ڳالھ مہاڑ کریندے وفاقی وزیر اطلاعات خیبر ٹی وی کوں ٹورنامنٹ دا فائنل جتݨ تے جنگ گروپ دی رنر اپ ٹیم کوں مبارکباد ݙیندے آکھیے میڈیا کرکٹ لیگ دا انعقاد خوش آئند اے، کرکٹ لیگ اچ تقریبا 67 میچزتھئن جنہاں اچ سارے میڈیا چینلز دی ٹیماں حصہ ڳھدے۔ وفاقی وزیر اطلاعات ایں طرح دے مزید ٹورنامنٹس دے انعقاد دی لوڑھ تے زور ݙیندے آکھیے ٹیپ بال ٹورنامنٹ پاروں وفاقی دارالحکومت اچ رونق لڳی رہی۔ وفاقی وزیر بہترین ٹورنامنٹ دے انعقاد تے جنگ میڈیا گروپ اتے منتظمین کوں مبارخ ݙیندے آکھیے ملک اچ کھیݙاں تے سپورٹس مین سپرٹ کوں ودھارا ݙیوݨ دی لوڑھ اے ، حکومت ٹیلنٹ کوں مزید ابھارݨ سانڳے کاربند اے۔ وفاقی وزیر آکھیے قومی کرکٹ ٹیم وی فتوحات حاصل کریندی پئی اے ، گزریل ݙینھ پاکستان ویسٹ انڈیز کوں ٹیسٹ میچ اچ شکست ݙتی، آسٹریلیا کوں آسٹریلیا اچ شکست ݙتی، جنوبی افریقہ اچ قومی کرکٹ ٹیم دی کارکردگی بہتر رہی۔ انہاں آکھیے چیمپئنز ٹرافی دا پاکستان اچ انعقاد ساݙی خوش نصیبی اے، ایں توں ساݙے کرکٹ گرائونڈز دیاں رونقاں بحال تھئن ، جݙاں اساں چیمپئنز ٹرافی دی میزبانی کریسوں تاں دنیا دی بہترین ٹیماں پاکستان آسن تے آپݨا کھیݙ پیش کریسن ، شائقین کرکٹ کوں بہترین کھیݙ ݙیکھݨ کوں ملسی ، چیئرمین پی سی بی محسن نقوی اتے انہاں دی پوری ٹیم دی بھرپور کاوش اے، وزیراعظم وی پوری ٹیم کوں امپاور کیتے انہاں آکھیے پاکستان اچ 27 سال بعد شنگھائی تعاون تنظیم دا اجلاس تھئے ، ایویں ہݨ چیمپئنز ٹرافی وی پاکستان اچ تھیندی پئی اے جیں سانڳے سارے انتطامات مکمل کرڳھدے ڳئن ۔ انہاں ساری میڈیا دی انتظامیہ کوں آکھیے جو ایں طرح دے ٹورنامنٹس دا انعقاد کرن، وزارت اطلاعات ایں حوالے نال مکمل تعاون کریسی ۔ عطاءاللہ تارڑ آکھیے معیشت دے حوالے نال چنڳیاں خبراں آندیاں پئن ، مہانگ گھٹ تھیندی پئی اے ، شرح سود تلے ویندی پئی اے ، دنیا دے وݙے مالیاتی ادارے پاکستان تے اعتماد کریندے پئن ، سٹاک مارکیٹ تاریخ دی بلند ترین سطح تے پڄ ڳئی اے ، انہاں آکھیے الیکشن دا ھک سال پورا تھیوݨ تے وزیراعظم 8 فروری کوں یوم تعمیر ترقی دے طور تے مناوݨ دا اعلان کیتے ، اے سال کامیابیاں دا سال رہیے، معیشت بحال تھئی اے ، پاکستان اچ وݙے وݙے ایونٹس منعقد تھیندے پئن، مختلف شعبیں اچ فتح ملدی پئی اے ۔ 8 فروری دا ݙینھ بھرپور طریقے نال یوم تعمیر و ترقی دے طور تے منیسوں ، ہائی اچیورز کوں سݙ تے ایوارڈ ݙتے ویسن ۔انہاں آکھیے پی ٹی وی اچ پرائیویٹ سیکٹر توں اینکرز کوں گھن آیا ڳئے ساریاں سیاسی جماعتاں دے ارکان کوں شو اچ سݙیا ویندا پئے ، پی ٹی وی اچ کہیں قسم دی کوئی سنسر شپ کائنی ، پی ٹی وی کوں اساں مزید ودھارا ݙیسوں ۔ ھک سوال تے انہاں آکھیے مذاکرات سیاسی استحکام سانڳے ہن ملک اچ معاشی استحکام آندا پئے ، معیشت دی بحالی تھی چکی اے ہݨ گروتھ آلے پاسے ودھدے پیوں ، سیاسی استحکام معاشی استحکام نال جڑ ونڄے تاں پاکستان ترقی دے ایجنڈے تے کاربند تھی ویسی ، پرامید ہاں جو مذاکرات دا چنڳاں رزلٹ ملسی
