اسلام آباد۔21جنوری(اے پی پی) امریکہ دے صدر ڈونلڈ ٹرمپ امریکہ اچ امیگریشن اتے سیاسی پناہ تے سخت نویاں پابندیاں دا اعلان کریندے امریکہ میکسیکو سرحد تے فوج تعینات کرݨ دا حکم ݙتے تے آکھیے جو تارکین وطن دی پیدائشی امریکی شہریت ختم کرݨ دیاں کوششاں کریسوں ۔ اے ایف پی موجب صدر ٹرمپ اوول آفس اچ ھک اہم پریس کانفرنس اچ جنوبی سرحد تے قومی ہنگامی حالت دے نفاذ دا اعلان کیتے۔انہاں صحافیاں دے سوالاں دا جواب ݙیندے آکھیے امریکی آئین اچ درج پیدائشی امریکی حق شہریت کوں بدالݨ دے اقدام کوں سخت قانونی چیلنج دا سامݨا کرݨا پئے سڳدے میکوں لڳدے جو اساں کنے چنڳیاں بنیاداں ہن ۔ انہاں آکھیے انہاں کوں قانونی امیگریشن نال کوئی مسئلہ کائنی ،اساکوں لوکاں دی لوڑھ اے تے میں ایں د نال بالکل ٹھیک ہاں لیکن لوکاں کوں قانونی امیگریشن حاصل کرݨی ہوسی۔انہاں آکھیے سارے غیر قانونی داخلے کوں وختی طور تے روک ݙتا ویسی ، اتے اساں لکھاں غیر ملکیاں کوں انہاں دی جاہ تے واپس بھیڄݨ دا عمل شروع کرݙیسوں جتھوں او غیر قانونی طورتے آئے ہن ۔ ٹرمپ دے اہم مشیر اتےمشہوراینٹی امیگریشن اسٹیفن ملر سوشل میڈیا پلیٹ فارم ایکس تے آکھیے امریکا اچ داخلے دے خواہشمند سارے غیر قانونی غیر ملکیاں کوں ہݨ واپس ونڄݨا چاہیدے ، بغیر اجازت دے امریکا اچ داخل تھیوݨ آلیں کوں قانونی کارروائی تے ملک بدر کرݨ دا سامݨا کرݨا پئے سڳدے ۔کیلی آکھیے ٹرمپ انتظامیہ’’میکسیکو اچ رہو ‘‘ دی پالیسی کوں وی بحال کریسی جیڑھا جو ٹرمپ دی پہلی انتظامیہ دے تحت رائج ہئی ۔ایں اصول دے تحت، جیڑھے لوک میکسیکو دی سرحد تے ریاست ہائے متحدہ امریکا اچ داخل تھیوݨ سانڳے درخواست ݙیندن ، انہاں کوں اوں ویلھے تئیں ایجھا کرݨ دی اجازت کائناں ہئی جݙاں تئیں انہاں دی درخواست تے فیصلہ نی تھی ویندا۔
