اسلام آباد۔22جنوری(اے پی پی) پاکستان اقوام متحدہ کوں تجویز پیش کیتی اے جو سلامتی کونسل دے مستقل ارکان دی ویٹو پاور کوں ختم یا ممکن حد تئیں محدود کیتا ونڄے تاں جو ایں 15 رکنی ادارے کوں دنیا دے ودھدے مسئلیں نال نبڑݨ سانڳے مزید موثر بݨایا ونڄ سڳے۔ اے ڳالھ اقوام متحدہ پاکستان دے مستقل مندوب منیر اکرم انٹر گورنمنٹل نگوشی ایشنز دے مندوبین توں خطاب اچ آکھی ، انہاں آکھیے ویٹو دا استعمال یا ایں دے استعمال دی تڑی بین الاقوامی امن و سلامتی کوں لاحق خطرے یا انھاں دی خلاف ورزی دے جواب اچ فیصلہ کن کارروائی اچ رکاوٹ اے۔ انہاں آکھیے تعطل دا شکار بین الحکومتی مذاکرات ( آئی جی این ) جیں دا مقصد کونسل دی تنظیم نو کرݨ اے اچ ایں وجہ توں پیشرفت نی تھیندی پئی ۔کونسل کوں مزید موثر بݨاوݨ سانڳے ضروری اے جو یا تاں مستقل ارکان دے ویٹو حقوق کوں ختم کیتا ونڄے یا ایں دے استعمال کوں محدود کرݙتا ونڄے ۔ پاکستانی مندوب آکھیے توسیع شدہ کونسل اچ اضافی ریاستاں دے ویٹو دے حقوق ودھاوݨ مسئلے کوں مزید ودھا سڳدے ۔ اے ھک وجہ ہئی جو پاکستان اتے کئی ٻئے رکن ملکاں سلامتی کونسل اچ نویں مستقل ارکان دی مخالفت کیتی ، سکیورٹی کونسل اچ اصلاحات سانڳے فروری 2009 اچ جنرل اسمبلی اچ پنج اہم شعبیں اچ بشمول رکنیت ، ویٹو ، علاقائی نمائندگی، توسیع شدہ سلامتی کونسل دا حجم اتے کونسل دے کم کرݨ دے طریقے تے مکمل مذاکرات شروع تھئے۔ انہاں آکھیے سلامتی کونسل اچ اصلاحات دے پاسے پیشرفت مسدود اے کیوں جو جی ۔4 ممالک (بھارت، برازیل، جرمنی اتے جاپان ) کونسل اچ مستقل نشستاں سانڳے زور ݙیندے پئن جݙان جو اٹلی اتے پاکستان دی قیادت اچ اتحاد برائے اتفاق رائے (یو ایف سی) گروپ کہیں وی طرح دی مخالفت کریندے ۔انہاں آکھیے برطانیہ، چین، فرانس، روس اتے امریکا مستقل ارکان ہن جݙاں جو 10 غیر مستقل ارکان ݙو سال سانڳے چݨیے ڳئن ۔سفیر اکرم سلامتی کونسل اچ مستقل اتے غیر مستقل ارکان وچال اثر و رسوخ دے عدم توازن کوں ھک پاسے کرݨ دے مطالبے دی حمایت کیتی ۔ وݙے پیمانے تے نسل کشی جیھے ظلم دے ماحول اچ ویٹو دا استعمال محدود کرݨ دی تجویز دی حمایت کریندے انہاں آکھیےجݙاں ویٹو دا استعمال کیتا ونڄے تاں جنرل اسمبلی کوں زیادہ ذمہ واری ݙکھاوݨی چاہیدی اے ۔سفیر منیر اکرم آکھیے پنج مستقل ارکان دا اثر و رسوخ اتے ویٹو دے استعمال سانڳے انہاں دی حرکات کوں سلامتی کونسل اچ نویں غیر مستقل ارکان دے رلاوݨ توں روکیا ونڄ سڳدے۔
