وزیر خزانہ سینیٹر محمد اورنگزیب دی صدارت اچ ای سی سی  دا  اجلاس ،  صنعتی شعبے سانڳے گیس ٹیرف اچ ودھارا منظور، گھریلو صارفین سانڳے مسترد

اسلام آباد۔25جنوری(اے پی پی) اقتصادی رابطہ کمیٹی (ای سی سی) دا اجلاس وزیر خزانہ سینیٹر محمد اورنگزیب دی صدارت اچ تھئے جیں اچ وزارت پیٹرولیم دی طرفوں صنعتی شعبے (کیپٹو پاور) تے غیر محفوظ گھریلو زمرہ جات سانڳے گیس ٹیرف اچ ودھارے دی تجویز تے غور کیتا ڳئے ۔ وزارت خزانہ توں جاری بیان موجب اجلاس اچ وفاقی وزیر پیٹرولیم مصدق مسعود ملک، وزیر توانائی سردار اویس احمد خان لغاری، وزیر مملکت خزانہ و محصولات علی پرویز ملک، چیئرمین اوگرا، چیئرمین ایس ای سی پی، وفاقی سیکرٹریز اتے متعلقہ ڈویژنز دے سینئر افسراں شرکت کیتی ۔ ای سی سی تفصیلی غورکرݨ دے بعد مالی سال 2024-25 دے دوران گیس دے شعبے سانڳے مطلوبہ آمدݨ کوں یقینی بݨاوݨ سانڳے کیپٹو پاور پلانٹس سانڳے گیس ٹیرف کوں 3000 روپے فی ایم ایم بی ٹی یو توں ودھا تے 3500 روپے فی ایم ایم بی ٹی یو کرݨ دی منظوری ݙے ݙتی ۔ گھریلو صارفین سانڳے گیس ٹیرف اچ ودھارا نہ کرݨ دا فیصلہ کیتا ڳئے تاں جو انہاں تے اضافی ٻوجھ نہ پاتا ونڄے ۔ ای سی سی وزارت پیٹرولیم کوں ہدایت ݙتی جو کیپٹو پاور پلانٹس تے گرڈ ٹرانزیشن لیوی دے نفاذ سانڳے وختی اقدامات کیتے ونڄن تاں جو توانائی دے شعبے دی کارکردگی کوں چنڳاں بݨایا ونڄ سڳے۔